Dialuna mainta, Ministerio Publico a manda e relato di prensa aki pa avisa tur hende cu ta pensa di bay afo, pa pasa vakantie, cu si nan tin debe di boet of di belasting, cu lo exigi pa esaki wordo paga prome cu e cuidadano por sali di Aruba. Afpakteam ta activo for di maart caba y awo cu ta temporada cu hendenan ta bay gasta placa pa disfruta di un vakantie, afpak team ta haya cu pagonan di boet y di belasting mester ta na prome lugar cu cualke viahe of vakantie. E chens ta grandi cu bo por te hasta keda deteni pa motibo di tin debe di boet of belasting habri. Mihor bo keda sin bay vakantie y paga bo debe di boet of belasting.
Afpakteam di Aruba ta dedica extra atencion e temporada di vakantie aki, na boetnan cu ta habri ainda y cobranzanan di belasting cu no a wordo paga ainda. Na juni hopi hende ta haya vakantiegeld, y esey ta haci cu nan tin mas espacio den nan cartera pa paga e boetnan y cobranzanan aki. Door di paga na tempo ta evita cu un boet ta wordo aumenta of den e caso di mas extremo, cu hende ta wordo deteni of ta haya un prohibicion pa viaha. Vooral e ultimonan ey lo nifica un inicio desagradable di vakantie.
Afpakteam di Aruba ta haci un yamada na personanan cu tin boetnan atrasa of cobranzanan di belasting habri, pa bin paga. Caha di Ministerio Publico ta habri di dialuna pa diabierna di 08.00 pa 11.30’or di mainta y di 13.00 pa 15.30’or di atardi. Caha di Departamento di Impuesto ta habri di dialuna te diabierna di 07.45 pa 11.45’or di mainta y di 13.15 te 15.30’or di atardi.
Afpakteam ta un entidad di cooperacion di Ministerio Publico di Aruba, Cuerpo Policial, Cuerpo di Aduana, Fiot (Fiscale inlichtingen- en opsporingsteam) di Departamento di Impuesto, FIOD (Fiscale Inlichtingen- en Opsporingsdienst), Marechaussee, Kustwacht di Aruba, MOT y RST. E Afpakteam ta combati criminalidad financiero-economico y a cuminza traha riba prome di maart ultimo.