Minister Dangui Oduber a anuncia cu lo usa un otro alternativa cu no ta afecta pueblo!
Dialuna Minister Dangui Oduber a anuncia den conferencia di prensa di Gobierno cu no lo continua cu Eigen Bijdrage mas. E decision aki a wordo tuma pasobra CAFT no kier permiti AZV bin cu un vangnet social cu por protege esunnan mas vulnerabel den nos sociedad. CAFT ta bisa cu e grupo aki cu ta cai bao di e vangnet social ta mucho grandi y pa tal motibo no ta aproba esaki. Ta bon conoci cu CAFT a impone riba AZV pa corta 60 miyon florin pa aña. Suma cu CAFT nunca por a onderbouw ni hustifica te na e dia di awe. Oposicion mas bien tabata pusha y fiesta pa e eigen bijdrage wordo introduci, pasobra e Protocol di Dialogo Social cu Mike Eman a firma na 2014, tabata inclui e medida aki. Pueblo por pasa wak e documento aki cerca mi.
Un rapport cu alternativanan briyante
Minister Dangui Oduber a continua elaborando den su conferencia di prensa cu den rapport di profesor Hubben Batenburg di BC Zorg, tin diferente recomendacion cu a wordo haci pa por reduci e gastonan actual. Den esaki e hospitalnan a formalisa un aliansa pa traha hunto, pa sigura y mehora e cuido medico aki na Aruba. Ademas a forma un cooperacion pa bai cumpra remedi hunto cu lo bai economisa AZV mas cu dos biaha compara cu loke e eigen bijdrage lo mester a trece aden. E compra di e remedinan hunto lo duna AZV un prijs hopi mas faborabel y asina por spaar basta placa. Di e forma aki pueblo lo no mester paga e eigen bijdrage mas. E creatividad y reformacion den AZV inicia pa minister Dangui Oduber a demostra cu no tur medida mester afecta pueblo, pero cu inovacion y vision por trece cambionan positivo den nos departamento di cuido cu awor lo bai funciona mas eficiente y mas efectivo.
Un plan cu ta cumpli cu exigencia di CAFT y un cuido di calidad accesibel
Mi no por keda sin menciona cu varios siman pasa mi a tene un rueda di prensa unda mi a declara cu si eigen bijdrage bin, un vangnet social mester bin. Mi a menciona cu lo mi no sostene un eigen bijdrage sin un social vangnet. Pesey, awe mi ta sumamente satisfecho cu e plan nobo aki di minister Dangui Oduber y ta gradici’e pa e bon trabao y creatividad di dje y su ekipo. Cu e plan aki, AZV lo cumpli cu e exigencianan di CAFT cabalmente y alaves por garantisa cu e cuido brinda na nos pueblo ta keda uno di calidad, sostenibel, accesibel y pagabel.
Si pueblo desea mas informacion di e articulo aki, contact mi na tel: 528-4639 of email mi na: [email protected] / Bo Parlamentario y sirbidor di pueblo na bo ordo semper!