Awe dialuna 25 di juli nos por a sigui e rueda di prensa di Minister Rocco y pueblo por ta orguyoso cu porfin a transforma cuerpo di bombero. Desde inicio di Gabinete Evelyn Wever-Croes I a pone cuerpo di bombero como prioridad y cu continuacion di Gabinete Evelyn Wever-Croes II pueblo por wak e logronan y asina cuerpo di bombero por sigui garantisa seguridad rond Aruba, pero sigur pa na nos Aeropuerto internacional cu ta di vital importancia pa nos economia.
Situacion di cuerpo di bombero na 2017
Na momento cu Gabinete Evelyn Wever-Croes I a tuma mando a topa un cuerpo di bombero den un situacion penoso. Un cuerpo di bombero cu uniform den mal estado, handschoennan na werki, laarsnan den pesimo estado , trucknan cu ta start cu bleki di pif-paf, edificionan den pesimo situacion, bevorderingnan pega, bluspaknan no apto y sigur aparaturanan pa hala rosea cu tabata afgekeurd y asina mes mester a ser usa. Pues un situacion di yora unda cu nos debe nacional a ser duplica pero no a yega na cuerpo di bombero cu tabata ser exponi na peliger pa nan bida. Un acto hopi iresponsabel pa un ex gobernante.
Situacion di cuerpo di bombero na 2022
Danki na un vision y sigur cu a pone cuerpo di bombero como un prioridad door di Gabinete Evelyn Wever- Croes I y II, awe Minister Rocco Tjon ta sigui cu e vision aki, unda awe nos por a nota un overhaul completo di cuerpo di bombero. A inverti den bluspaknan nobo y aparatura pa hala rosea, a percura pa uniform nobo, handschoen, laarsnan y helmnan nobo. A percura pa 2 tankwagen nobo, 2 truck auto spuit, 1 crashtruck nobo. Tur esaki tawata posibel danki na e vision y sigur na e hunta di Minister cu a aproba 2.2 miyon pa por finalisa e compranan di esakinan p’asina cuerpo di bombero por tin 6 truck nobo. Banda di esaki a percura pa tur bevorderingnan cu tabata pega keda procesa y tambe a percura pa opleiding cu lo cuminsa na augustus benidero. Ademas actualmente nan ta bezig ta renoba e post di Sanicolaas cu tabata den un situacion deplorabel y sigur tin di menciona cu a renoba e central di alarma completo caba. Y sigur asina tambe lo sigui traha pa mantencion y mehoracion di otro edificionan y lo explora den futuro e posibilidad pa un post nobo di bombero na Santa Cruz.
Pues de facto cuerpo di bombero ta conoce un era nobo unda nan por traha na bienestar di comunidad, pero sigur unda cu por garantisa siguridad di cada miembro di cuerpo di bombero. Pues esaki t’ un muestra di traha cu vision y prioridad unda por wak con esaki ta duna su frutonan y sigur den un periodo di retonan financiero ta mustra e capacidad di un gobierno pa traha den tempo di crisis. Un felicitacion ta bay na Minister Rocco Tjon y na Gabinete Evelyn Wever-Croes y sin kita afo e incansabel trabao di sindicato di bombero lidera pa sr Roza.
