Diaranson ultimo dia 20 di juli 2022, Minister President sra. Evelyn Wever-Croes a anuncia cu e luna aki oficialmente Gobierno lo debolbe empleadonan publico e 5 % bek. Pa por a logra esaki tawata tin diferente condicion den negociacion entre Gobierno di Aruba y Hulanda pa por a cuminsa debolbe empleadonan publico, semi-publico y fundacion nan placa di recorte riba salario bek.
Condicionnan di Hulanda
Palabracion entre Gobierno di Aruba y Hulanda tawata cu Aruba mester a presupuesta e suma pa e pago aki cual nan a cumpli cu n’e y Parlamento a aproba e ley di presupuesto 2022. Otro codicion ta cu Gobierno mester presenta e ley di Normering Topinkomens (LNT) na Parlamento. Esaki tuma lugar te cu Parlamento a haci su ronda y a sinta cu diferente instituto cu e ley aki ta aplicabel pa nan y a colecta tur informacion, feedback y preocupacion cu introduccion di e ley di LNT. Parlamento cu base di tur informacion a evalua y nos a presenta cambio na e LNT y a pasa e ley aki. Otro condicion di Hulanda tawata cu politiconan no ta ricibi nada bek riba e recorte di 25% riba salario, pues ni Minister ni Parlamentarionan no a ricibi esaki tampoco.
Cambionan introduci na e LNT
Cambio por medio di amienda cu Parlamento a introduci na e LNT ta bon funda. Ta dos cambio a wordo introduci na e ley cu ta e periodo di transicion di 2 pa 5 aña y e nivel di salario maximo di esnan cu ta traha den institutonan semi-Gubernamental y NVnan di Gobierno. E periodo di 2 pa 5 aña ta un cambio mas husto pa e empleadonan aki mirando cu nan mester adapta nan mes y alabes kier evita un cantidad di casonan penal contra Gobierno gastando asina mas placa. Tambe basa riba e hecho cu Hulanda mes a aplica un periodo di transicion di 7 aña ora nan a pasa e ley di LNT.
E salario maximo a wordo adapta por medio di amienda aproba pa fraccion di MEP y Raiz den Parlamento di e suma di 261 mil pa 329 mil florin. E suma di 261 mil florin tawata a base di 130% di e salario di Minister President di pais Aruba aplicando e recorte di 25% cu tur politico a entrega. E recorte riba salario di politiconan ta basa riba e ley di voorziening Politieke Ambtsdragers unda ta indica cu e recorte ta tijdelijk van aard (temporal). Despues di algo mas di 2 aña aplicando e condicion cu e recorte ta temporal, basa riba e hecho cu mayoria sector y Aruba completo ta bayendo na su normalidad, y ademas mirando cu e ley di LNT ta cuminsa drenta na vigor despues di 2 aña y lo tuma 5 aña di transicion pa drenta na vigor completo, Parlamento no ta wak e necesidad pa aplica 25% di recorte pa stipula e nivel di entrada pa Topinkomens. E cambio introduci na e ley di LNT no tin niun impacto directo y mas ainda no ta cambia ni mishi cu e principio y meta di e ley. Ta e derecho constitucional di Parlamento pa introduci amienda riba ley y no a haci cambio sin a haci sondeo profundo.
Como Parlamentario, basa riba tur e puntonan splica den e comunicado aki, ami no ta sinti cu Gobierno di Hulanda por pidi Parlamento di Aruba pa cambia e ley di LNT bek. Si Parlamento acepta e ley aplicando salario recorta di Minster Presidente, en especial mirando cu un di e condicionnan ta cu Politiconan no mag di ricibi nada bek di e 25% di rercorte salarial, cu e recorte ta un cambio temporal y cu ya a transcuri mas cu 2 aña, esaki lo wordo considera como un indicasion cu Parlamento mes ta acepta tur esaki como e normal nobo pa e sistema di salario di politiconan na Aruba?
Mester bay bek na normalidad
Ta momento cu pais Aruba tin e derecho di bay bek na su normalidad. Apesar cu esaki ta encera cu mester deal tambe cu tur e efectonan laga atras door di e crisis causa pa e Pandemia. Tin impactonan grandi riba mundo di transporte di productonan, scarsedad di productonan, cu na su turno tin influencia grandi riba costo di bida. Ademas tin mester di espacio pa deal cu e impacto di guerra entre Russia y Ucraina cu tin consecuencianan di subida drastico di prijs di gasolin na mundo. Aruba cu ta importa practicamente tur cos ta wordo afecta y ta importa costo di bida di e pais di importacion tambe.
Si salarionan di tur sector na Aruba bay bek na normalidad, esaki ta contribui na e economia di Aruba mes. Mas nos tarda pa bay bek na nivel di salarionan prome cu Pandemia, mas lo stroba economia di Aruba recupera y mas dependiente Aruba ta keda di solamente e pilarnan cu por trece e spin off necesario den nos economia.
Parlamentario Setty Christiaans-Yarzagaray ta gradici tur empleado di sector Gubernamental, semi-Gubernamental y fundacionnan y Aruba henter cu a coopera na un manera of otro pa Aruba por a pasa mas miho posibel door di e efectonan di e Pandemia di Covid-19. Ban sigui wak padilanti awor con nos por sigui contribui na progreso di nos pais.