Recientemente Fundacion Tienda di Educacion conhuntamente cu Fundacion Telefon pa Hubentud a culmina cu e di dos grupo pa 2022 di e proyecto Best Dad Ever. Un total di 11 tata a ricibi nan certificado despues di a sigui e trayecto extenso di 10 sesion. E trayectonan a wordo organisa pa Centro Pa Hoben y Famia manera tambe Cedehm. Durante e trayectonan a elabora ariba diferente aspecto y tambe preocupacion di un tata ora ta trata desaroyo y lantamento di un yiu.
Tin hopi pregunta y tambe desafio cu tatanan ta topa cu nan ora di lantamento di un mucha. Tin hopi informacion riba rednan social y tambe riba internet tocante e topiconan pero semper e comunicacion directo cu otro mayornan tin mas balor agrega. Ora ta trata e hende homber den su rol como tata tin hopi desafio ta presenta. Den mayoria caso e hende homber no lo acerca otro tata facilmente cu pregunta. Den e trayecto di Best Dad Ever tatanan ta haya e oportunidad di comunica y tambe haya informacion di expertonan riba e materia con pa anda cu e diferente desafionan aki. Den bida di un persona tin diferete fase cu ta cuminsa for di e momento di nacemento. Ta p’esey ta importante pa haci pregunta y por acerca instancianan concerni manera Fundacion Tienda di Educacion ora tin pregunta of preocupacion tocante lantamento di un yiu.
Tin varios trayecto cu Fundacion Tienda di Educacion ta colabora cu otro instancianan den e ramo social. Asina e organisacion tin lasonan estrecho cu por ehempel: Fundacion Telefon Pa Hubentud, Fundacion Pa Nos Muchanan, Fundacion Respeta Mi, Centro Pa Hoben y Famia, Wit Gele Kruis Aruba, Fundacion Anti Droga Aruba, Departamento di Asunto Social, Directie Voogdijraad, Buro Sostene Mi, Fundacion Guia Mi y tambe diferente scol. Fundacion Tienda di Educacion ta forma parti di e Comision Pedagogico di Aruba.
Fundacion Tienda di Educacion kier gradici Fundacion Telefon pa Hubentud pa e colaboracion estrecho y tambe e confiansa brinda di por forma parti di e proyecto Best Dad Ever. Tambe un gradicimento na Famia Planea, na partera srta. Stephany Daal y na sr. Johnny Boekhoudt pa nan contribucion den e trayecto. Un proyecto cu sigur ta contribui na bienestar di nos muchanan y specialmente na e hende homber den su rol como tata y pa fortifica e laso cu su yiu.
Tienda di Educacion ta situa den edificio di Centro Pa Hoben y Famia, Sabana Blanco 68-C. Orario di servicio ta di 8 am – 6 pm. Por contact Tienda di Educacion di dialuna pa diabierna via 161, Facebook Messenger of e-mail [email protected]. Pa keda informa like y follow e Facebook & Instagram Page. Bishita tambe nan Website y YouTube Channel pa mas informacion.