ORANJESTAD – Awe mainta cuater homber a presenta dilanti Hues den Corte di Husticia pa e caso penal cu Ministerio Publico a cuminsa contra nan. Nan ta wordo acusa di ta envolvi di importacion di casi 30 kilo di droga riba 27 di October 2021.
ARUBA NARIVE por a compronde cu e hombernan J-M.R.M., R.F.M., J.M. ta famia di otro mientras cu e homber R.W. ta un Venezolano biba na Aruba.
Hues a bisa cu Polis a haya informacion cu e grupo ta bay cu boto pa busca droga for di un otro boto procedente di Venezuela. Polis tabata scucha cellularnan y tabata observa movecion di e grupo aki.
Riba 27 October 2021, Polis tabata observa e boto cu a sali pa pisca cu e rumannan R.F.M. (Panama) cu su ruman J.M. Despues e boto a bolbe na pier di Rodgers Beach y a mira J-M.R.M. busca un tas for di e boto, hinca esaki den un auto y core bay cu esaki na cas di J.M.
HOPI DROGA NA CAS
Polis a bay investiga na e cas y a haya casi 16 kilo di marihuana y casi 14 kilo di cocaina. R.F.M. a bisa Hues cu durante pisca el a mira un tas ta drief, su ruman J.M. a bis’e no coy esey. E tog a coy esaki y a duna J-M.R.M. pa hib’e cas.
Hues a bisa cu segun Polis, Guarda Costa a constata cu riba 27 October 2021 dos boto a topa otro ariba laman. A notifica helicopter y a logra saca 2 potret di e botonan cu tabata para banda di otro pero ora a mira helicopter a navega for di otro. Un di e botonan tabata esun cu R.F.M. y J.M. tabata ariba.
Hues a mustra cu na 2013, R.F.M. a wordo condena pa droga na 3 aña y 6 luna di prison. El a mustra tambe cu R.E. den pasado tambe a wordo condena pa traficacion di droga na 2 aña y 8 luna di prison.
FISCAL
Fiscal a bisa Hues cu e ta haya legalmente proba cu a importa droga. Investigacion ta mustra cu R.F.M. hunto cu J.M. tabata riba laman entre Aruba y Venezuela. Nan a bay pier di Rodgers Beach y eynan a pasa J-M.R.M. un tas. Tin potret di helicopter di Guarda Costa cu e boto di R.F.M. tabata banda di un boto di Venezuela. Fiscal a bisa cu Polis a confisca casi 16 kilo di marihuana y casi 14 kilo di cocaina na cas di J.M. Esaki tabata den e tas. Fiscal ta haya cu J-M.R.M. tabata vigila laman pa su omo R.F.M. di Guarda Costa. El a core bay coy e tas y core bay na su auto y core bay cu velocidad. Na opinion di Fiscal, esey ta mustra cu J-M.R.M. tabata sa cu tin droga. Esey ta haci cu e ta complice. Pa loke ta R.E., Fiscal ta consider’e cu tabata dirigi e traficacion.
Fiscal a bisa cu droga ta pone salud di hende na peliger. Ta hopi droga a keda confisca. E ta haya cu tin diferente funcion den e caso aki. Pa R.E. kende na opinion di Fiscal, tabata esun cu tabata duna orden pa busca droga riba laman, el a exigi 6 aña di prison. Pa e rumannan R.F.M. y J.M., kendenan ta esnan cu a bay busca e droga, el a exigi 5 aña di prison pa cada un. Pa J-M.R.M. cu tabata vigila, el a exigi 3 aña di prison.
Dentro di algun siman Hues lo bay dicta sentencia.
