Diabierna 22 di april Stichting Monumentenfonds Aruba a ricibi e Pieter Van Vollenhovenprijs pa e proyecto di restauracion di e edificio di Uncle Louis Store na B van der Veen Zeppenfeldstraat 7.
Un premio cu ta yena Monumentenfonds Aruba como propietario y Directie Natuur en Milieu como usuario sigur cu orguyo.
Locual ta haci e premio aki mas special ta cu e ta e prome biaha cu ta otorga e premio pa un proyecto pa un di e islanan Caribense den Reino Hulandes. Esaki precisamente un luna despues cu e islanan Caribense di Reino Hulandes a topa otro na Boneiro pa un conferencia caminda a firma un intencion pa sigui traha hunto pa intercambio di conocimiento riba terreno di herencia cultural.
E premio aki sigur lo yuda stimula organisacionnan riba e otro islanan pero tambe personanan priva na Aruba of cualkier parti di Reino pa tuma e iniciativa pa restaura un monumento y asina contribui na preservacion di nos herencia cultural pa futuro generacionnan.
Pieter van Vollenhovenprijs
E Pieter van Vollenhovenprijs ta un permio cu ta keda entrega tur aña na un particulier of organisacion cu a tuma e reto pa preserva un monumento den Reino door di dun’e un funcion nobo. E premio a keda ofreci na 2013 na prof. mr. Pieter van Vollehoven na su despedida despues di tabata pa 27 aña largo presidente di Nationaal Restauratiefonds. Den su añanan como presidente señor Van Vollenhoven a para fuerte pa esnan cu tuma e iniciativa propio pa preserva un monumento. Pa mantene e pensamiento aki bibo a institui e premio pa asina stimula un y tur cu kier tuma e iniciativa pa restaura y duna un funcion nobo na un monumento.
E premio a keda entrega e aña aki for di manan di sr. Van Vollenhoven mes y directora di Stichting Monumentenfonds Aruba, Anne Witsenburg, a ricibi esaki. Ela dedica e premio pa un y tur cu ta traha cu curpa y alma pa e preservacion di nos herencia cultural riba e islanan. Mientras cu na Aruba e team di Monumentenfonds y Directie Natuur en Milieu a sigui e entrega di e premio den presencia di Gobernador sr. Alfonso Boekhoudt, Minister Arends y partnersnan di e proyecto.
E ganadornan
Na total e aña aki tin cuater ganador:
E Volmolen na Amersfoort di aña 1645 construi pa e industria di textiel a keda restaura y a habri su portanan manera un Katoendrukkerij.
Fort Hoofddorp construi na aña 1904 cu a forma parti di e liña di defensa di Amsterdam awor ta un monumento accesibel pa publico comberti den un parke di ciudad cu espacio pa horeca y diferente actividadnan cultural y educativo.
Fifth/ NRE Eindhoven, un fabrica di gas di aña 1901 awor ta un club di jazz y restaurant combina cu un koffiebranderij. A conserva e interior y exterior mas tanto posibel den su forma original y asina a conserva un herencia industrial y alabes crea mas espacio pa actividadnan cultural.
Uncle Louis Store, e monumento di Uncle Louis Store ta un edificio construi den añanan cincuenta, diseña pa arkitecto Jan Nagel y construi den un estilo di ‘Nieuw Bouwen’ tabata pa hopi aña edificio di Uncle Louis Store cu tabata un tienda di bende tela y accesorionan di moda. Na principio di añanan nobenta gobierno a cumpra e edificio y esaki a bira oficina di Aduana. Despues cu pa basta aña e edificio a keda bashi, Stichting Monumentenfonds Aruba a cumpra e edificio cual ta un monumento proteha y asina a restaura esaki completamente den su forma original. Locual ta haci esaki un proyecto special ta cu e ta e prome monumento cual ta inclui panelnan solar, un sistema di reciclahe di awa y un green wall haciendo esaki un di e monumentonan mas sostenibel na Aruba. Actualmente e edificio ta e oficina di Directie Natuur en Milieu cual ta haci e edificio accesibel tambe pa publico un biaha mas. Cu e proyecto aki nos por garantisa cu futuro generacionnan tambe lo conoce Uncle Louis Store y su historia.
