Cali, Colombia
un cabesante di e cartel di droga di Sinaloa a wordo aresta na Colombia, despues cu un modelo a post un potret di e cabesante di e cartel riba Facebook.
Ta trata di Brian Donacio Olguin Berdugo miho conoci como “Pitt”. Autoridad ta mir’e como un cabesante di e cartel di droga di Sinaloa. y e tabata wordo busca internacionalmente.
E criminal aki tabata fungi como e contacto entre e cartel Mexicano di Sinaloa y diferente grupo di guerilla na Colombia. Desde februari caba Pitt tabata na Colombia, pero tabata sa con pa move entre Calli y Medellin sin cu autoridad por a logra gar’e.
Brian Donacio Olguin Berdugo tabata tin probablemente un relacion cu un modelo Colombiano y tabata sali cu e dama aki frecuentemente. Brian a permiti e dama aki saca potret di dje y e dama aki a post e potret riba facebook. Despues di esaki mesora polis Colombiano a cuminsa cu un investigacion y despues di 14 dia, 24 ora pa dia ta observando e criminal aki cu tabata wordo busca internacionalmente, autoridad finalmente a logra deten’e na Cali.
Actualmente e ta deteni y ta wardando su posibel extradicion. Segun medianan Colombiano Pitt a ofrece polis 265 mil dollar pa lag’e den libertad.
