ORANJESTAD – Awe mainta Hues, despues di a scucha Fiscal y abogado mr. D.Croes, a declara e dama M.L. liber di e acusacion di a causa morto di e homber S.Pop riba Watty Cos Boulevard.
ARUBA NATIVE por a compronde cu Fiscal ta acusa M.L. cu riba 27 Maart 2020, door di su culpa a causa morto di e homber S.Pop. A sosode un accidente riba Watty Vos Boulevard caminda M.L. a dal S.Pop y despues di mas o menos 1 ora S.PoP a fayece na hospital.
Den sala di Corte M.L. a splica Hues cu e dia ey mainta e tabata core tras di un auto riba Watty Vos Boulevard. E tabata core mas o menos 60 km pa ora. Diripiente el a mira cu e auto su dilanti ta desvia na robez. El a mira cu mas dilanti tabatin mas o menos 4 hende cu un Bobcat ta haciendo e caretera limpi. E tambe a desvia y na dado momento ora e tabata bayendo bek na man drechi, el a mira un sombra dilanti su auto y a tende un sla na e auto.
M.L. a spanta y brake. El a bira panico, sende luznan di señal, sali for di auto y mira e homber Pop ainda na bida benta abao dilanti e auto. M.L. a yama un colega di Cruz Cora, kende a presenta y nan a cuminsa traha cu e victima promer cu ambulance a yega.
M.L., kende ta un voluntario di Cruz Cora pa mas cu 20 aña, a bisa Hues cu e tabata paga tino riba trafico y no a spera cu diripiente un hende ta bin dilanti su auto. Hues a bisa cu tin testigo a bisa cu a mira e victima tabata cana ariba e sero mey mey di e caretera y a trompeca dos biaha.
M.L. a bisa Hues cu despues di e accidente tragico, el a keda lunanan largo malo y bou tratamento. E mester a haya pilder pa por drumi. El a bisa cu pa hopi tempo e no por a core auto riba Watty Vos Boulevard. Solamente si e ta necesario e lo core. Hopi tristo y na yoramento el a bisa cu e tin cu biba cu e tristeza aki pa resto di su bida. El a bisa cu e tabata kier a bay entiero di Pop pero el a wordo avisa pa no bay.
FISCAL a bisa Hues cu ta importante pa bisa adelanta cu no ta acusa M.L. di a mata Pop. E acusacion ta door di no a paga suficiente tino, M.L. a causa accidente cu consecuencia cu Pop a fayece. Fiscal a bisa cu M.L. no a paga suficiente tino pa mira cu e victima Pop tabata riba caminda. Na opinion di Fiscal, tin testigo P. a bisa cu trafico tabata hopi trankilo y diripiente el a tende sonido caminda Pop a wordo gedal door di un auto y e chofer no a brake. Fiscal a exigi 80 ora di trabao pa comunidad y si no cumpli cu esaki lo mester bay 40 dia sera den prison. Tambe Fiscal a exigi 1 aña condicional sin por core cu un tempo di prueba 2 aña.
ABOGADO mr. D.Croes a bisa Hues cu M.L. a bira hopi malo door di e accidente. El a bisa cu M.L. a keda sorprendi cu Fiscal a bin cu un caso penal. E abogado a bisa Hues cu Polis a bisa M.L. pa no worry pasobra e no tin culpa. E abogado a mustra cu segun investigacion di Polis, Pop tabata cana riba e pida mey mey di e caretera y a trompeca y cay riba e caretera. E abogado a bisa Hues cu e testigo P. a bisa cu el a tende un sonido y ora el a bira, el a mira cu Pop a wordo gedal. Con e por bisa cu e chofer no a brake si e accidente a sosode caba? E otro testigo M. a bisa cu el a mira Pop ta cana riba e sero mey mey di e careteranan y cu dos biaha el a trompeca y e ultimo el a slip cay dilanti e auto. El a bisa cu M.L. tabata core trankil y conciente. Pesey esaki ta wordo considera como accidente. Mr. Croes ta haya e castigo exigi pa Fiscal no ta corecto. El a pidi Hues pa declara M.L. liber.
HUES a sera tratamento di e caso y a bisa cu e ta dicta sentencia di biaha. Hues ta haya cu ta un hecho cu tabatin hendenan ta traha riba e caretera. M.L. no tabata core duro y no tabata core irresponsabel. Ta un hecho cu Pop tabata riba e sero mey mey di e caretera. M.L. a kita pa core poco poco pa e trahadornan. Hues no ta comparti punto di bisti di Fiscal cu M.L. mester por a mira e victima. El a bisa cu tin testigo a mira cu e victima a trompeca for di e sero. Na opinion di Hues, ora bo ta core riba un caretera, bo no por spera cu diripiente hende ta subi caminda. Hues ta haya cu M.L. no tin culpa. Hues a bisa cu Pop no mester tabata riba e caretera. Hues a declara M.L. liber. Por a mira M.L. hopi emociona a brasa su casa.
 |
ReplyForward
|