ORANJESTAD – Diahuebs mainta a tuma luga e prome reunion pa loke ta e grupo cu ta forma parti di e “sociaal veiligheidsberaad”. Un plataforma di dialogo nobo, cu Ministerio di Husticia y Asuntonan Social a introduci y tin como meta pa trece e dos veldnan esta; husticia y asuntonan social, mas serca di otro. Segun Minister di Husticia y Asuntonan Social Sr. Rocco Tjon, e plataforma aki lo bay percura pa ambos veld por delinea procesonan mucho mas miho pa asina eleva e bienestar y e siguridad pa esnan cu tin mas mester di dje.
Segun e mandatario, E plataforma aki ta consisti di departamentonan cu ta representa ambos veld, entre otro Ministerio Publico y Cuerpo Policial, pero tambe Centro Ortopedagogico, Departamento di Voogdijraad, Fundacion Guiami, Bureau Sostenemi, Departamento di Asuntonan Social y Family Justice Center. E plataforma di dialogo aki ta hopi importante pa asina por delinea procesonan mas miho pero tambe compronde otro mas miho. E plataforma aki lo percura pa logra mas y brinda mas siguridad na esnan cu tin mester di esaki.
Pa medio di e plataforma aki lo trata tematicanan riba nivel strategico, entre otro topiconan den cuadro di tratadonan cu nos mester atene nos mes na dje como pais Aruba. Banda di esaki lo trata partinan mas practico tambe, por ehempel ora cu casonan presenta caminda e departamentonan ta haya nan mes confronta cu retonan, lo purba yega na palabracionnan strategico, caminda e procesonan di un instancia ta alinia y ta wordo delinea mas miho cu esun di e otro instancia.
Henter e cadena di husticia y asuntonan social ta traha pa eleva e bienestar y siguridad pa esnan cu tin mas mester di dje. Tin ta haci esaki door di señala ora cu tin un problema, percura pa e caso ey wordo traspasa pa un otro departamento cu ta bay haci e investigacion, y tambe percura pa pasa e informacion pa e departamentonan cu ta encarga cu e parti di ayudo y e “nazorg”. Pa e motibo aki, e ta importante pa e tres pasonan den e proceso aki ta hopi bon alinia na otro.
Por ultimo, minsiter Tjon a indica cu a haci palabracionnan concreto, caminda lo bay bin cu un grupo di piloto cu ta bay consisti di profesionalnan di cada departamento. Ta trata aki di un ekipo multi-disciplinario, caminda dentro di poco, despues di a atende cu algun casonan specifico, lo bin cu un nota di recomendacion, caminda lo percura pa ahusta procesonan caminda ta necesario, pa asina mas y mas ful e cadena por traha na un forma mas uniforma.
