Oranjestad – E siman aki miembronan di Fundacion Arte Pro Arte (FARPA), sra. Amy Lasten y Juliet Chieuw hunto cu profesora internacional di Teatro sra. Hilda Hellwig a bishita DCA. Sra. Hilda Hellwig, ta kende a duna e Master Class di Teatro na docente y directornan di teatro durante 2 luna largo cu a pasa. Nan a haci un bishita cerca drs. Siegfried Dumfries, director di DCA y a expresa nan contento y danki na tur e colaboracion ricibi y con tur cos a bay riba Dia Mundial di Teatro. Durante e anochi di presentacion di e resultado di Master Class y entrega di premio nacional di Teatro na sr. Persey Jean D’or.
E combersacion a bay ameno y a trata varios punto importante. Tambe a papia riba un bunita proyecto cu sra Hilda Hellwig tin pa futuro cercano. Y a sondia tur e posibilidad pa bini cu un tayer di teatro y presentacion na final. Esaki principalmente como parti di conscientisacion di temanan social den comunidad treci pa medio di arte. Ta pensa di realisa esaki na final di e aña aki y principio di otro aña. Caminda teatro lo trece bida, creatividad, arte y concientisacion.
Na su turno drs. Dumfries di DCA a bolbe felicita nan pa e bunita anochi aki den Cas di Cultura y a keda palabra cu lo duna sosten na e proyectonan venidero.
