Despues di 2 aña di ausencia debi na e pandemia,
A.T.A., ta contento cu Soul Beach Music Festival ta regresa Aruba.
Di 25 te cu 30 di mei, 2022 Aruba lo ta anfitrion un biaha mas di Soul Beach Music Festival.
E ‘headliners’ pa e evento aki ya ta conoci unda Mike Epps lo presenta diabierna pa e Comedy Night, Mary J. Blige diasabra y New Edition diadumingo. Hunto cu nan lo tin varios otro artista cu lo presenta y di e forma aki celebra hunto e di 20 edicion di Soul Beach Music Festival.
Oficina di Turismo, A.T.A., ta wak e regreso di Soul Beach Music Festival como otro indicador di recuperacion pa Aruba su turismo. E di 20 edicion di e festival lo mester a tuma luga na 2020, pero debi na e pandemia ni na 2020 ni na 2021 tawata tin Soul Beach Music Festival.
A.T.A. ta midi e impacto economico cu un evento manera esaki ta trece pa Aruba pa di e forma ey calcula con rendabel e inversion ta. Na 2019, e ultimo biaha cu e festival aki a tuma luga, e tawata tin un impacto economico directo pa Aruba di $12 miyon, atrayendo 6,530 bishitante internacional, cu a gasta un averahe di $372 pa persona, pa dia y tawata tin un estadia averahe di 6.3 anochi. Si compara e cifranan aki cu e aña anterior; 2018 por bisa cu a wak un crecemento di $3 miyon na 2019. E cantidad di bishitantenan tambe a subi cu 1,000 bishitante mientras e gasto averahe pa persona pa dia a bira $22 mas cu e aña anterior y e averahe di bishitante a keda 0.3 dia mas na Aruba na 2019 copara cu 2018.
Basa riba un encuesta haci na 2019 a indica cu 78.8% di e bishitantenan internacional cu a atende e festival, a bin cu e proposito especifico di atende e festival. 87.5% di entradanan pa e festival a wordo cumpra door di e mercado Norte Americano. 77.5% di e bishitantenan a keda den hotel y tawata tin indicacion fuerte for di e bishitantenan di lealtad pa e destino y e festival.
A.T.A. ta spera cu e festival lo por crece bek y yega na nivelnan cerca di 2019 mirando e recuperacion rapido cu ya caba ta tumando luga pa Aruba.
Carchi pa localnan lo ta na benta cuminsando e fin di siman aki na e prijs special di US $70.- pa anochi na varios localidad rond di Aruba.
-FIN-