Comerciantenan un biaha mas ta invita pa participa na e Dialogo Comercial Latino America

ORANJESTAD – Rijksdienst voor Ondernemend Nederland conhuntamente cu Departamento di Asuntonan Economico, Comercio y Industria (Exprodesk) ta invita comerciante y empresario di Aruba pa asisti den un biahe virtual pa Latino America y Caribe. E biahe virtual aki lo brinda participantenan oportunidadnan comercial pa expande den e region. Riba diahuebs 31 di maart 2022, e Latin America (LATAM) Business Dialogue ta tuma lugar di un manera virtual di 9.00 – 11.00 a.m., den cual tur interesado ta invita pa participa.
E region Latinoamericano ta un mercado multifacetico, pero cu tambe por trece retonan specifico. Sin embargo cu e contacto, conocimento y mindset corecto, tin diferente oportunidadnan ta presenta pa nos comerciante y empresario.
Pues asina e LATAM Business Dialogue tin como meta pa trece e comunidad comercial di nos paisnan den Reino (Hulanda, Aruba, Corsow y Sint Maarten) hunto cu Latino America pa por yuda trece e conocimento, contacto y mindset cu mester pa drenta den mercado Latinoamericano. E LATAM Business Dialogue ta dirigi na e empresario y comerciante cu sea ta cuminsa of ja tin experiencia, pero kier expande den mercadonan Latino Americano.
E LATAM Business Dialogue riba diahuebs 31 di maart 2022 lo consisti e prome ora di charlanan interesante pa inspira y informa e participante. Siguientemente lo por participa na “Round table” virtual cu representantenan di Reino den e paisnan Latino Americano pa brinda informacion specifico di bo interes. Ademas e plataforma virtual ta brinda e participante un manera di comunica cu otro participante, cu ta haci cu banda di haya informacion, bo por haci reunionnan Business2Business cu por yudabo amplia bo red comercial. E sesionnan lo ta na Ingles y Hulandes cu posibilidad pa dialoga den Spaño
Pa participa por registra ainda te cu e dia di e evento riba e siguiente link: https://www.rvo.nl/actueel/evenementen/latin-america-latam-business-dialogue Tambe por haya e link y mas informacion riba e Facebook page di Exprodesk.
Exprodesk ta e ‘Export Promotion Desk’ di Aruba, situa na Departamento di Asuntonan Economico, Comercio y Industria cu e obhetivo pa contribui na un desaroyo economico sostenibel na Aruba atrabes di e capacitacion di nos empresarionan. Pa logra esaki, Exprodesk ta brinda sosten y guia na tur empresario cu lo kier exporta nan producto of servicio door di duna consulta, training y workshop.