ORANJESTAD – Siman pasa Minister di Cultura a bishita Aruba Adventist Academy den cuadro di celebracion di Dia di Himno y Bandera. Na su yegada e mandatario a wordo ricibi pa e alumno- y docentenan di e scol. E mandatario a pasa bishita e klas y aki e alumnonan a comparti cu e Minister nan obranan traha en conexion cu Dia di Himno y Bandera, ademas e alumnonan a comparti nan conocimiento, stimacion y aprecio pa nos pais Aruba. Mayoria di e alumnonan no a nace na Aruba pero a bin biba na Aruba hunto cu nan mayornan cu ta labora na nos pais. Ta di admira e conocimento cu e alumnonan tin di nos pais su simbolonan nacional, custumber y cumindanan crioyo. Minister di Cultura Xiomara Maduro a gradici y a comparti cu e alumnonan, expresando un frase na e alumnonan cu nos Libertador G.F. Betico Croes a usa na diferente ocasion: “Arubiano no ta solamente esnan cu nace na nos Pais Aruba, pero arubiano ta tambe esnan cu ta stima y tin Aruba den nan mente y curazon”. Mustrando cu nos pais ta forma pa diferente persona di diferente nacionalidad cu a bin establece na Aruba y ta biba den union y ta traha y contribui na progreso di nos pais. E staf y alumnonan a keda masha encanta cu e bishita di minister di Cultura y a obsekia e mandatario un regalo.
