Aruba ta para dilanti retonan financiero fuerte!
Den ultimo simannan aki tin basta movecion cu locual ta trata nos presupuesto 2022. Sin duda e ley di presupuesto aki mester a pasa caba, y mester bisa cu e ta basta laat. Sinembargo, mester enfatisa cu e retonan di pais Aruba ta grandi y nan ta hopi real, cualnan a haci’e dificil pa e por a wordo termina na tempo. Como parlamentario mi ta urgi gobierno si, pa locual ta trata aña 2023, pa nos por cuminsa wak un presupuesto cu ta cla na tempo segun ley ta stipula. Gobierno por lo tanto tin e oportunidad e aña aki pa entrega e presupuesto 2023 na tempo. Esaki lo exibi un standard nobo y necesario den e maneho di nos pais. E ta un oportunidad pa demostra liderazgo y compromiso cu nos pais, door di demostra cu gobierno di Aruba si por cumpli cabalmente cu tur desafio cu e ta haye confronta cu ne.
Pueblo di Aruba ta pasando den e crisis di mas severo di su historia y e ta bay tuma un gobierno disciplina, creativo, enfoca, cu hopi dedicacion y compromiso pa por navega nos pais den e tempo y awanan bruto aki. Ta pesey e reunion publico aki cu ta bay trata nos presupuesto 2022 ta asina crucial, ya cu gobierno lo mester bini duna cuenta na Parlamento y pueblo, riba e maneho di finanzas cu a wordo confia na dje. Ta wordo spera cu e reunionan lo dura por lo menos cuatro pa cinco dia y lo cuminsa mainta y caba anochi laat.
Sigur nos lo wak diferente mocion bin dilanti di e fracionnan cu lo expresa nan prioridad y urgencianan pa e pais. Ademas di esaki e aspecto politico no lo haci falta y sigur lo tin debatenan largo y fuerte den e sala di Parlamento. E fechanan y orario di e reunionan publico cu lo trata presupuesto 2022 lo wordo anuncia pronto y lo por wak esakinan riba e facebook page di Parlamento di Aruba.
En conexion cu esaki, mi a bin ta prepara mi mes mas mihor cu ta posibel pa compronde e materia y haci hopi pregunta alcaso cualnan mi a dirigi na Gobierno di Aruba. Den mi preparacion, lesando e varios documentonan cu a wordo duna na Parlamento mi a formula un poco mas cu cien pregunta na e diferente ministerionan. Den esakinan mi ta haci pregunta tocante e maneho, presupuestonan di cada dienst, e forma di inversion y gastamento di placa y mucho mas. Naturalmente ora di Analisa e presupuesto mi ta teniendo cuenta cu e landspakket y Caft, cual ta delinea den ki rumbo nos finanzas publico mester wordo inverti y si gobierno ta cumpli cu esaki. Mi ta invita pueblo di Aruba henter pa sigui e reunionan publico aki y asina keda informa debidamente.