Seroe Blanco
Diahuebs den careda di 11 or y 15 di mainta, habitante di un cas na Seroe Blanco a pidi pa presencia di brandweer pa un auto na candela.
Hopi lihe brandweer a yega na e sitio y a ripara cu tabata trata di un candela di yerba. E candela tabata hopi cerca di dos auto staciona dilanti di e cas.
E señora di e cas, kende ta un persona recientemente opera y tabata cana cu kruk a spanta asina hopi cu e la bira malo y a cay.
Personal di brandweer mesora a pidi pa un ambulance pa duna e señora asistencia medico.
Brandweer a paga e candela y na momento cu algun persona a yega cerca e señora, brandweer a sigui su caminda. E señora a ser laga den e mes posicion te ora Paramediconan yega pa no causa algun daño mas innecesario.
Hopi lihe personal di ambulance a presenta na e sitio pa duna e señora asistencia medico.
