Den mi articulo anterior mi a cuminsa splica pueblo con nos a yega den e crisis social economico actual. Permitimi sigui elabora cu hechonan alcaso y corecto con esaki a tuma lugar. Den e splicacion aki, pueblo lo compronde tambe e importancia di continuacion gubernamental. E principio aki ta hopi facil di compronde. Si ami laga un negoshi cu debe, e siguiente doño lo mester paga esaki. Asina facil e ta. Ora otro gobierno drenta e mester acapara cu e consecuencianan di e maneho desastroso di Mike Eman. E consecuencianan aki lo ser sinti pa nos yiunan y nietonan pa basta aña mas nos dilanti.
Ora cu gabinete Wever-Croes-1 a tuma over mester a acapara cu un realidad; No por a inverti loke kier a inverti den e area social, enseñansa, y otro areanan importante mas pasobra nos pais, nos hendenan, nos bienestar, a wordo hipoteca pa casi 80% di nos GDP. Kico esaki ta nifica? Cu di cada 1 florin cu drenta caha di Gobierno, 80 cent ta bay na paga debe. Pues di e 1 florin ta resta nos 20 cent so pa maneha nos pais. Inversionnan mester a wordo corta pasobra nos pais no tabata tin mucho espacio mas pa haci prestamo pasobra AVP a laga nos cu CAFT, medidanan, y poco recursonan pa por a sigui cu inversionnan crucial cu pais Aruba tabata tin mester. Klinker, brug y caretera tabata mas importante pa Mike Eman cu e ser humano!
Na final di 2019 Covid a haci su entrada na mundo y na Maart 2020 Aruba a conoce su prome casonan. Aruba a bay den lock-down y pa varios luna a bay plat den tur sentido. Medidanan mester a wordo tuma pa sigura e bienestar di nos pueblo y pone e salud y bida di nos pueblo central. Despues di algun luna a cuminsa habri nos frontera poco poco, y a cuminsa ricibi algun entrada economico. Sinembargo, e impacto di e perde asina hopi entrada tabata devastador pa nos pais.
Pa prome biaha den historia di Aruba, nos a bay bati na porta di Hulanda. Si Hulanda no lo a presta nos 1.2 Biyon den e temporada aki, Aruba lo a conoce un desaster y un realidad ainda mas scur! Henter e aparato publico no lo tabata tin placa pa paga gastonan, ni salario di niun hende, y e mercado internacional no lo a presta nos mas pasobra nan no lo tin garantia pa haya nan placa bek. E prestamonan di Hulanda e impulsa nos debenan y a haci nan 115% di nos GDP. Den otro palabra: Impagabel!
Pesey awor tin tanto exigencia, control y cortamento na nos pais. Aki ta unda e realidad di e maneho desastroso di sr. Mike Eman ta morde nos como pais! Den crisis nos tabata tin mester 1.2 biyon pa keda cu nos cabes riba awa. Nos lo por a acapara esaki facilmente si nos no a wordo hipoteca cu orguyo te cu casi 80%. Nos lo por a fia facilmente y sin tanto medida, si no a hipoteca nos cu orguyo. Sinembargo e ta un realidad cu nos mester biba cu ne y corda semper kende a posiciona nos pais pa disaster: sr. Mike Eman!
Mike Eman a haya Aruba resiliente y fuerte. No tabata tin crisis, Mike Eman a crea crisis pa Aruba. El a causa cu CAFT a bin. Mike Eman a bin haya Aruba contento, fuerte, yen di inversion. Awor e ta Aruba ta yen di hipoteca. Sin espacio drechi pa inverti den nos instancianan y economia. Awe sr. Eman ta pretende cu e tin e derecho di reclama dicon prijs di gasoline ta subi, dicon no tin inversion, dicon tin pobresa, dicon ta corta tur caminda. E respuesta di tur esakinan ta facil pa compronde awor: POBRESA = Mike Eman, CRISIS= Mike Eman. Awor cu pueblo ta compronde e realidad, tur hende por compronde mihor. E realidad ta crudo, duro y pakico nos ta unda nos ta. E solucion ta pa nos lora manga y traha duro pa Aruba por sali for si e situacion aki hunto.