ORANJESTAD – Awe mainta Corte di Husticia a trata e caso penal cu Ministerio Publico a cuminsa contra e agente di Polis S.E.
ARUBA NATIVE por a compronde cu na dado momento S.E. a admiti den Corte cu el a realiza cu e no a actua corecto door di detene su ex amiga T.
Fiscal ta acusa S.E. cu riba 26 April 2021, el a mal usa su funcion como agente di Polis y falsificacion di procesverbaal
Hues mustra cu e dama T. tabata ex partner di S.E. Nan tabatin un relacion dificil. Segun S.E. na April 2021 ainda nan tabatin contacto cu otro. Dia 26 April 2021 e tabata cu un colega ta patruya a bay Arashi. El a bay cumpra algo di bebe na un snackbar. El a duna su colega un bleki y a bisa cu e ta bay detene T. cu tabata patras di e snackbar cu dos bebida. Segun S.E., esaki ta contra e ley di Covid cu no ta permiti pa tin alcohol riba caminda publico.
Ta asina cu un rato promer S.E. tabata papia cu T. na e bar di e snackbar y a coy T. su cellular pa mira den dje. Hues a remarca cu e dama T. no a haci un crimen sino tabatin dos bebida. E ta puntra su mes si esaki realmente tabata motibo pa bay detene. S.E. a bisa cu realmente no. Despues el a realisa cu no tabata corecto y a lamenta. Hues ta haya cu pa motibo personal S.E. a actua contra su ex amiga T. Na opinion di Hues, esaki ta mustra un forma di venganza.
El a mustra cu S.E. a detene e dama T. y pone mannan na boei.
Fiscal a bisa cu e tin un otro imagen di e caso cu loke S.E. ta bisa. El a bisa cu S.E. a coy e dama T. su cellular y despues di hopi pidi T. a haya su cellular bek. E dama T. na dado momento a wordo deteni door di S.E. pasobra segun S.E. e ta burachi. Fiscal a mustra cu S.E. ta bisa cu a base di ley di Covid no por tin bebida. Na opinion di Fiscal, esey no ta asina pasobra e dama T. tabata den e snackbar y no pafor manera S.E. ta bisa. Fiscal ta haya cu S.E. su intension tabata pa deporta T. y no pasobra cu el a mira T. ta bebe. E ta haya cu ta door di jaloersi S.E. kier a saca T. for di Aruba. Fiscal a expresa cu Fiscal y Hues mester por confia den relato di Polis pa por determina un caso. Aki ta falsificacion di un relato. Un Polis mester actua corecto tur momento aunke cu por ta un asunto personal. El a tuma S.E. na malo. El a exigi 180 ora di trabao of 9 dia sera. Tambe el a exigi 6 luna di prison condicional cu 3 aña di prueba.
Despues di a scucha defensa di abogado, Hues a bisa cu dia 31 di Maart 2022 lo tin sentencia.