ORANJESTAD – Diamars mainta na parokia di St. Cruz, a tuma luga e Santo Sacrificio di Misa pa henter e cuerpo di Guarda Nos Costa, cual a cumpli 20 aña di existencia. Un organisacion cu a wordo funda dia prome di Maart di aña 2002, pa ex-Minister di Husticia Sr. Hyacintho Rudolfo “Rudy” Croes, den feliz memoria. E motibo pa a funda Guarda Nos Costa, ta pa combati ilegalidad, di cual te dia di awe ta traha duro pa logra esaki. Pues, un mainta placentero caminda a duna un danki na henter e cuerpo special aki, cu ta traha duro y cu hopi pasion, na e bienestar di pais Aruba.
Minister di Husticia y Asuntonan Social Sr Rocco Tjon, tawata presente na e Santo Sacrificio di Misa, y a celebra hunto cu nan, e bunita fecha aki. Despues di e Santo Sacrificio di Misa, e personal y invitadonan a pasa pa un desayuno na Renaissance Convention Center. E Mandatario a expresa cu esaki ta un momento hopi importante pa para keto riba e importancia di e departamento aki, pa pais aruba. Ta asina cu na aña 2002, ex- Minister di Husticia Sr. Rudy Croes den feliz memoria, tawata tin un vision y a dicidi di lanta e departamento aki pa combati ilegalidad, di cual a duna e departamento tres tarea specifico. E tres tareanan aki ta ensera; control di estranheria; centro di detencion di personanan indocumenta; siguridad na nos frontera.
Durante tur e añanan aki, si a sigui e trayecto di e departamento aki, ta wak su balor agrega. Segun Minister Tjon, den e parti di husticia por a wak diferente unidad y diferente departamento lanta, pero despues di tempo a waknan disolve tambe. Sinembargo, Guarda Nos Costa ta un di e organisacionnan cu tey ainda, pues pa un motibo specifico tambe a scoge pa hacinan un organisacion como tal. Na aña 2019 ex-Minister di Husticia Sr. Andin Bikker, a percura pa e “instellingsbesluit”. Awendia ta trahando riba e rapport di formacion pa asina por hancra e organisacion, pa garantisa nan existencia pa e añanan nos dilanti, pero tambe e posicion huridico di tur e trahadonan.
Por ultimo, Minister Tjon a logra combersa un rato cu e personal, a reflexiona riba e importancia di nan trabou, pero tambe con pisa nan trabou ta, un trabou caminda e circunstancianan ta haci esaki hopi pisa y pa e motibo ey a gradici nan pa nan dedicacion, perserverancia y pa tur e añanan aki. Tambe a deseanan un dia placentero, cual nan ta merece.
