ORANJESTAD – Diahuebs mainta na Museo Arkeologico Nacional di Aruba, Minister Xiomara Maduro di Cultura, tabata invitado pa presencia e lansamento di e proyecto ‘Op Zoek Naar Boy’ cu ta un proyecto na unda studiantenan di scol secundario lo bay den archivonan di nos historia y asina busca informacion pa nan haya sa mas di Boy Ecury, ken e tabata como persona, kico el’a representa pa nos y e rol cu el’a hunga den segunda guerra mundial.
E mainta a habri cu palabra di sra. Anne Witsenburg, directora di Monumentenfonds cu a subraya cu awor, mas cu nunca, e proyecto aki ta di balor mirando e acontecimentonan cu tin pasando rond mundo. E mainta a sigui cu un representantenan di skolnan Filomena College MAVO y Colegio San Antonio cu tambe ta wak e balor cu e proyecto aki tin pa enseñansa y cultura. Despues di esaki, sra. Conny Groot di Stichting Cultuurgeneratie a hiba palabra contando esnan presente di con a bin na e idea di e proyecto aki y con e studiantenan lo participa den esaki. Finalmente, Minister Maduro a hiba palabra bisando cu ‘nos tur tin un Boy ta biba den nos’ y cu awor, mirando tur locual ta pasando rond mundo, ta momento pa para keto un rato y pensa pa nos mes ta con e lo tabata pa Boy, tempo cu e tabata pasando den segunda guerra mundial, y kiko nos por siña di Boy.
E proyecto aki ta un colaboracion entre Stichting Cultuurgeneratie, Monumentenfonds Aruba, Museo Archeologico Arubano, Archivo Nacional, Muchila Creativo, Filomena College MAVO, Colegio San Antonio, Muchila Creativo y Media College na Amsterdam y tin como meta pa stimula nos studiantenan pa recorda y honra nos heroenan di antes y di awo pa celebra cu ainda nos por crece y biba den libertad.
Minister ta gradici tur esnan cu a colabora cu e proyecto aki. E mandatario ta gradici e hoben Crystal Brete di Muchila Creativo pa su bunita ilustracion di Boy. Minister Maduro ta contento cu e proyecto aki cu ta stimula e hobennan pa ta mas curioso y busca pa sa mas di e historia di nos Pais.
