ORANJESTAD – Awe mainta e homber G.R.G.(40) di Colombia biba na Aruba a presenta dilanti Hues pa un caso penal. Fiscal ta acusa G.R.G. di riba 13 September 2021 a menaza un persona cu morto y tabatin un arma di candela Glock 9 mm cun’e.
ARUBA NATIVE por a compronde cu den Corte, G.R.G. ta para riba cu e no a menaza sino su primo. Fiscal a mustra cu a haya un Glock den e auto di G.R.G. y e persona ta reconoce G.R.G.
Segun G.R.G. el a ocasiona un accidente y a surgi un discusion, caminda su primo a baha tambe for di auto y tabata discuti cu esnan para rond di e otro auto. Segun G.R.G. e kier a yega na un areglo cu e otro persona pero no a logra. El a subi su auto y bay.
Hues a bisa cu e persona a bisa Polis cu G.R.G. lo a menace cu un arma di candela. E persona a duna discripcion di e auto. Mas laat Polis a para un auto cu ta cuadra cu e discripcion y a haya un arma. E persona a reconoce G.R.G. como esun cu a menace. Segun G.R.G. e no tabatin un arma riba dje y e arma a wordo haya bou asiento di pasahero unda su primo tabata sinta. Hues a bisa cu den cellular di G.R.G. tabatin un potret di Glock. El a bisa Hues cu su primo tabata anda cu su cellular y por bien ta cu el a saca potret di e Glock scondi den e camber di G.R.G.
Fiscal a bisa cu un persona ta bisa cu el a wordo menaza cu un arma. Despues ta reconoce G.R.G. riba potret. Despues den oranan di anochi, Polis a para G.R.G. y a haya arma den e auto. Den cellular di G.R.G. tin potret saca den su camber cu e arma. Pesey Fiscal ta haya cu ta legalmente proba cu ta G.R.G. tabatin e arma. El a bisa Hues cu e arma tabatin un peña mas largo cu normal. Fiscal a exigi 30 luna di prison y cu e arma lo wordo saca for di circulacion.
Hues despues di a scucha defensa di abogado, a sera tratamento di e caso y a dicta sentencia di biaha. E ta haya legalmente proba cu G.R.G. a menaza hende cu arma di candela. Hues a bisa cu den pasado caba, a condena G.R.G. pa posecion di arma. Hues a confirma e exigencia di Fiscal y a condena G.R.G. na na 2 aña y 6 luna di prison (30 luna), kitando e tempo cu G.R.G. ta sera den KIA. Tambe el a ordena pa saca e arma for di circulacion.