E empresarionan ta splica di nan productonan
ORANJESTAD – Prome Minister Evelyn Wever – Croes ta splica e inspiracion tras di escogencia di regalonan cu a obsekia Secretario di Estado Alexandra van Huffelen durante su bishita na Aruba. Sra. Van Huffelen a expresa di keda sumamente contento cu e regalonan y a aprecia esakinan masha hopi.
Pa locual ta e set di marca “Ha’bon” ta trata di productonan di compania local cu ta traha cu personanan cu limitacion. Bunita di e compania aki ta cu e ta promove inclusion di tur persona den comunidad, cual ta algo cu Gabinete Wever – Croes II ta sostene. Ademas di esaki, e compania ta brinda productonan di super bon calidad.
E otro obsekio cu a regala sra. Van Huffelen ta un bunita sjaal di diseñador local Gigila Gomez. Un diseño di un collecion inspira pa ‘biento’, nos colornan di bandera y nos hendenan local. Tur esaki refleha door di un diseño colorido y Caribense.
Productonan di cuido marca Ha’bon
Naline Heilbron ta splica cu Ha’bon ta un compania di productonan traha na man na Aruba door di personanan cu limitacion. Sra. Heilbron ta splica cu e momento cu el a ricibi yamada di Prome Minister Evelyn Wever – Croes, cu e peticion pa un regalo special pa e bishita internacional aki, tabata un momento yena cu orguyo.
‘Ha’bon Aruba, no ta unicamente habon. Como cu e demanda a cuminsa crece, e mercado tambe a cuminsa crece. Nos a cuminsa aventura exitosamente den otro ramonan di cuido di cuero ‘skin care’, a base natural cu ingredientenan natural.’
E regalo cu a scoge ta uno edicion limta, traha cu champaña. Y ta un promedio di 60 dia pa e madura pa e yega na e mihor PH pa bo cuero, cabei y henter curpa. Tambe a scoge full e liña di colageno, elastina hyaluronic acid como parti di e regalo, sra. Heilbron a splica. Dene cahita cu tambe ta wordo traha na man pa personanan cu limitacion, ta inclui un carchi cu tur historia di con ta traha e producto y e team cu ta tras di e productonan.
‘Ta orguyoso di e oportunidad y contento cu Prome Minister a scoge productonan di Aruba, pa haci un entrega na un persona hopi importante. Ta sigur cu tur locual cu a traha y cu a obsekia ta sali for di curson y cay na bon tera.’
Sjaal di Gigiola Gomez
Diseñadora local Gigiola Gomez tambe a expresa cu como Arubiano e ta orguyoso di a haya e oportunidad pa a traves di Prome Minister, scoge un regalo pa Secretario di Estado van Huffelen. ‘Arubianonan tin hopi talento y mester support esaki. Prome Minister sigur a haci un bon impresion.’
Sra. Gomez a sigui splica cu e inspiracion tras di sjaal escogi ta nos cultura. ‘Mi a wordo inspira como cu Aruba ta trece hopi hende cerca, diferente nacionalidad cu ta trece desaroyo pa nos pais. Mi ta kere nos hendenan ta nos personanan clave y mester sostene otro. Mi a inspira tambe no solamente pa hendenan, pero tambe e biento cu ta supla nos bandera nacional. E sjaal tin e print di colornan di nos bandera y e movimento di biento cu ta trece tur hende hunto.’
Sra. Gomez a keda hopi contento cu Prome Minister ta considera nos Arubianonan pa trece algo asina dilanti, pa intruduci hendenan internacional articulonan tipico, autentico y cu tin un storia di conta di nos cultura. Tur Arubiano tincu uni y empodera otro pa nos por yega internacional. Pa esaki, colaboracion ta hopi importante’, sra. Gomez a termina bisando.
