Pavia country Club: Diabierna algo prome cu mey anochi, varios habitante di Pavia Country Club y Sero Preto a pasa den un susto di nan bida.
Na momento cu un homber biba den caya Franse Bloem, probablemente bou influencia di un of otro substancia a terorisa e bario di Pavia Country Club y Sero Preto.
E homber di fam Croes, a topa cu un señora den un auto y a cuminsa ranca na e porta di auto, e la pidi e señora pa hibe Warda di polis. E señora a spanta asina hopi cu, e la primi gasolin bay, pero e homber a keda wanta na e porta di auto y a ricibi varios rasca na su curpa.
Na un cas na Seroe Preto e homber a drenta den cushina y a coy varios panchi y cuchiu bay cu nan. Dje e la cuminsa bula di un cura pa otro.
E homber no tabata na su sano huicio. Na prome instante a yame un ladron, a pensa cu e lo kier a atraca e habitantenan tambe.
E homber cu tabata tin un cuchiu den su poder a drenta den un cas na Pavia Country Club y a cuminsa bringa cu e doño di cas.
Mesora e habitantenan a bati alarma, cu hopi urgencia varios unidad di polis a bay na e cas. Na yegada nan a logra domina y a detene e homber.
Polis a bin ripara cu homber lo ta bou influencia di un of otro substancia. E homber tabata bula di un cura di cas pa otro y asina a comete varios destrucion.
No ta conoci si e homber aki tin problema mentalmente.
Na momento cu polis a detene, e homber tabata full soda, esey ta un señal cu e por ta bou influencia di un of otro substancia.
Polis a transport’e cu transportwagen pa Warda di polis y tambe lo a bay na e cas den caya Franse Bloem pa haya mas informacion y confirmacion si ta trata di e mesun persona di fam Croes.
Departamento tecnico di polis a wordo pida na e casnan caminda e la comete e destrucionnan.
