SERO BLANCO – Minister masha contento a anuncia un Parada Nacional di Luz cu ta bai door. E evento grandi aki ta conforme Aruba su Exit Strategy pa bolbe bek na normalidad. Tur medida a wordo elimina pa por bolbe bek na normalidad. Parti di bolbe bek na normalidad ta cu tur actividad cu tawata wordo organiza prome cu Covid, lo por wordo organiza bek awor.
Aruba a tuma un curashi pa organiza un parada di carnaval. Por mira tambe cu mundialemente tur pais na mundo ta flexibilisando nan medida nan of kitando nan por completo.
Den cuadro di e parada aki, nos a bin ta asercando tur compania estatal pa wak si nan por contribui, manera nan ta contribuyendo mas cu 10 aña caba pa cu e celebracion di cultura mas grandi di Aruba cu ta carnaval. Diferente compania estatal a duna indicacion cu nan ta participando y lo yuda tambe cu e celebracion cultural aki.
Te awor nos tin ATA, SETAR y tambe AAA cu lo ta yudando Aruba pa na un manera responsabel nos tur por celebra.
A duna danki na e director di SETAR NV Sr. Roland Croes pa e contribucion cu SETAR NV ta duna na nos carnaval. SETAR NV ta un di e sponsornan importante di Aruba su carnaval y un bes mas ta mustra nan compromiso pa cu cultura di Aruba.
E parada aki ta hopi esencial pa e recuperacion di Aruba su economia, e ta bay manda un señal cu Aruba ta bek na normalidad y esaki lo tin un efecto hopi positive pa cu Aruba su turismo. Pa e motibo aki nos ta keda comprometi pa e Parada Nacional Di Luz bai door y bira un exito.