ORANJESTAD – Awe mainta Hues di Corte di Husticia a cuminsa cu tratamento di e lamentable caso di tira mata e dama hoben Shayuri Petronia. Ta asina cu Fiscal a pidi Hues pa pospone e caso pa asina laga psychiater evalua e sospechoso Izak Principaal, kende ta esun cu a tira mata. Hues a dicidi cu ta trata parti di e caso y despues ta pospone esaki.
ARUBA NATIVE por a compronde cu e sospechosonan ta e
hombernan Zuriel Celaire y Izak Principaal. Ta asina cu Ministerio Publico a presenta un serie di casonan contra nan. E caso mas serio tabata e tira mata di Shayuri Petronia. Den sala di Corte por a mira miembronan di famia di e victima bista cu flanel cu potret di e victima.
Ta asina cu dia 4 Juni 2021, asistencia di Polis a wordo pidi na Flamboyanstraat 4, pa un caso di tira mata. Polis a mira e victima Shayuri Petronia drumi den plas di sanger. Investigacion a mustra cu el a sufri un tiro den cabez. A listra den cas, cu ta caminda Izak ta biba y a haya un caha di un pistool Glock, un caha cu por carga 50 bala.
Polis a investiga cellular di Shayuri y a haya 3 potret di Izak cu e Glock den man y boter bebida para dilanti di e cas. Hues a remarca cu den e cellular di Shayuri no a haya ningun snapchat manera tanto Zuriel como Izak ta bisa cu Shayuri a haci snapchat cu e arma y marihuana. Ta asina cu Zuriel a bay sconde e Glock pero despues Polis a bin haya esaki scondi den un cushinchi cu 2 peña. Un peña tabata bashi pero e otro peña tabatin 16 bala.
Durante tratamento di e caso ta sali na cla cu Zuriel y Izak tabata trip. Na dado momento na a bay na cas di Izak caminda despues di un rato Shayuri cu su amigo J. a yega serca nan. Ta asina cu Sharyuri lo ta biba hopi serca.
Pafor nan tabata bebe y huma marihuama. Segun Zuriel e no ta bebe ni droga. El a bisa Hues cu e ta corda bon bon kico a pasa.
Na dado momento, e amigo di Shayuri J. a bisa cu e ta bay. Despues Zuriel, Shayuri y Izak a bay paden di cas di Izak. Zuriel a bisa Hues cu Shayuri y Izak tabata lora un marihuana na un mesa. Riba e mesa tabata e Glock di Izak.
Na dado momento Shayuri lo a coy e arma y tabata haci snapchat cu esaki y marihuana den man. Zuriel a bisa Izak pa kita e arma. Promer cu Izak a reacciona, Shayuri a pone e arma riba mesa.
Un rato despues Izak a coy e arma y segun Zuriel, e peña a cay. E ora Izak a bay hala parti di e arma patras pa mira si tin bala den e loop. E tabatin su dede riba e gay. E momento ey e lo a perde balans riba e stoel cu tabatin un pia kibra. Door di e tilt aki, un tiro a sali y alcanza Shayuri cu ta sinta na otro banda di e mesa den cabez.
Fiscal a haci Izak un serie di pregunta. El a mustra cu tin hende a scucha discusion cu Shayuri y Izak. Shayuri a bisa cu tabatin discusion y Izak a bisa cu lo tir’e. Izak a bisa Hues cu Shayuri sa discuti cun’e cu mester limpia e cura of cu e mester bay traha pero nada di cu el a bisa di lo tira den cabez.
Ta asina cu Hues a pospone e caso pasobra e kier pa psychiater evalua Izak, manera Fiscal a pidi. A palabra cu 3 Juni 2022 lo sigui cu e caso.