Bubali:
Dialuna den careda di 11’or di anochi a sosode un boksmento na e rotonde chikito pariba di Superfood, na Bubali.
For di pabou di e rotonde tabata biniendo un Taxi Hyundai Santa Fe shinishi, cu a subi e rotonde sin pone tino cu riba e rotonde tabata biniendo un Chevrolet Spark for di panort pa bay zuid.
E impacto fuerte a manda e chevrolet Spark algun meter mas leu. E dama cu tabata tras di stuur di e Chevrolet Spark tabata keha di dolor.
E polisnan na e sitio a pidi pa presencia di ambulance pa controla e dama chauffeur. E paramediconan di ambulance a controla e dama y despues a dun’e un papel pa asina e por a bay polie mas despues.
Mirando cu e dama chauffeur tabata levemente herida, polis di trafico a presenta pa atende cu e boksmento aki.
