Henter comunidad a siña mas di Betico den e programa aki
ORANJESTAD- E aña aki Comision Celebracion di Dianan Nacional (CCDN) a introduci un evento nobo en conexion cu Dia di Betico, cu ta un programa di competencia na television ‘Kibra Coco’. E programa virtual aki a wordo pasa diamars dia 25 di januari, 5’or di atardi na tur canalnan di television local y tambe riba medionan social.
‘Kibra Coco’ ta un programa den forma di un quiz y ta consisti di cuater tanda di pregunta, entrevista y interaccion y como anfitrion a fungi Jean Carlo Espinal y Hilyann Croes. Pa e programa aki tur mucha di scolnan basico por a participa hunto cu nan famia for di comodidad di nan sala di cas y por a gana premio pa nan mes, nan famia y nan klas. Alabes tabatin un ‘Betico Challenge’, cual cada mucha di scol basico por a saca un selfie hunto cu su famia hungando ‘Kibra Coco’, mande via whatsapp na 597-2323 y asina por a participa pa gana un premio.
Den e prome tanda di e programa Minister di Cultura Sra. Xiomara Maduro tabata invitado y e mandatario a splica cu su Ministerio hunto cu Departamento di Cultura y Comision Celebracion Dianan Nacional a bin ta percura pa scolnan ricibi materialnan informativo y educativo pa nos muchanan ta bon informa tocante di Dianan Nacional y Fiestanan Cultural di nos Pais.
Nos muchanan di awendia ta interesa den e mundo digital y riba e sugerencia di algun docente di scol basico a bini cu e idea inovativo, Proyecto ‘Kibra Coco’. CCDN a forma un team y hunto cu algun docente boluntario a traha riba e proyecto aki. Tambe CCDN a traha un video di ‘Historia di Betico’ pa e scolnan basico por tin material di informacion tocante Betico.
Minister Xiomara Maduro a subraya cu meta di e programa ‘Kibra Coco’ ta pa promove tambe union familiar, pa hunto den famia pasa rato agradabel y educa specialmente nos muchanan pa locual ta historia di nos Pais. Den e ocasion aki, pa Gilberto François ‘Betico’ Croes su legado keda preserva y pa nos muchanan di scol conoce e historia di ‘E Libertador’ di nos pueblo.
E mandatario a informa durante e entrevista cu e dicho di Betico Croes cu mas ta inspire, ta ‘Un pueblo uni, hamas por ser venci, Aruba mester ta uni pasobra ta den union nos pueblo ta haya e forsa di coherencia pa hunto nos por trece Aruba bek riba pia. Ta den union, nos pueblo por enfrenta y surpasa tur reto y logra metanan grandi pa nos Pais Aruba’.
Den e segunda tanda tabatin como invitado e dos yiunan muhe di Betico, Guisette Croes y Glendeline Croes. Guisette y Glendeline a comparti algun anectoda di nan Tata y tambe a recorda dushi momentonan cu nan a convivi cu nan Tata y asina e televidente por a haya sa un poco mas di Betico.
Den e tercera tanda tabata tin como invitado Sandra Croes, cu ta conoci pa a interpreta varios cancion dedica na Betico Croes. Un di e cancionnan hopi popular ta ‘Libertador’. Sandra Croes a comparti su bunita experiencia di interpreta cancionnan dedica na e Tata di nos Pais Aruba.
E ultimo tanda tabata tin como invitado dos docente di scol basico, jufrouw Jessica Franken di Maria School y jufrouw Rose-Ann Croes di Scol Caiquetio. E docentenan a splica con den nan lesnan nan ta inculca e legado di Betico cerca e muchanan, den forma di entre otro presentacion y teatro. Na opinion di e docentenan ta di sumo importancia pa nos muchanan conoce historia di nos Pais y e lucha cu a ser hiba pa Betico Croes pa Pais Aruba por a haya su Status Aparte y tur locual e logro aki a trece pa nos Pais Aruba.
Den cada tanda a saca tres ganador, e prome premio ta consisti di un premio pa e mucha mes, como tambe un premio pa su famia y pa su klas. Pa e segundo y tercer luga e muchanan a gana un premio pa nan mes.
Anfitrion Hilyann Croes tabata encarga cu e ‘Betico Challenge’ y tabata anima esnan na cas pa participa y manda nan selfie y tabata presenta e potretnan riba pantaya di tur esnan cu a participa den e seccion aki. Na final e ganador a wordo anuncia.
E mandatario ta informa den transcurso di e simanan venidero tur ganado lo wordo invita pa bin ricibi nan premio durante un encuentro special.
Na final di ‘Kibra Coco’ Minister Xiomara Maduro a gradici e team organisado y tur esnan cu a contribui y coopera pa haci ‘Kibra Coco’ edicion ‘Dia di Betico’ un exito. Danki na CCDN, Departamento di Cultura, e docentenan cu a contribui, Telearuba, Setar y Elite. Un danki tambe na Setar, ATA, AAA, Utilities Group forma pa WEB, Elmar y Utilities, APA y Dominos Pizza cu a aporta cu premio. Un palabra di gradicimento ta bay na Canal 22, Diario TV y medionan social cu a transmiti ‘Kibra Coco’.
E dignatario ta recorda nos muchanan di scol basico pa keda pendiente pa e proximo competencia di ‘Kibra Coco’, cual lo ta edicion di ‘Dia di Himno y Bandera’.
