Riba 28 di januari 2022 Minister di Salud Publico y Turismo, sr. Danguillame Oduber, a entrega e registracion den AruBIG na 18 trahador publico. E ocasion aki a tuma lugar den un ceremonia na DVG. E motibo pa e ocasion aki ta cu pa prome biaha por a reconoce tur medico, dentista y boticario den servicio di gobierno. No ta haci distinccion mas entre diploma Hulandes y no-Hulandes. E sistema nobo bou di AruBIG ta amplia e posibilidad pa diplomanan di otro paisnan bou condicion cu nan ta cumpli cu e rekesitonan di e ley di AruBIG.
Cu e hecho aki AruBIG a haci posibel pa finalmente duna autorisacion na trahadornan publico pa haci nan trabow, no a base di un permiso, sino a base di un reconocemento completo di nan competencia y capacidadnan como experto den nan ramo. Di e manera aki a duna reconocimento na e trahadornan publico den e ramo aki cu a cumpli 10, 20 of mas cu 30 aña di servicio. Adicionalmente AruBIG a habri oportunidadnan nobo pa nan por sigui crece y desaroya nan mes como profesional.
E trahadornan publico cu ta ricibi nan registro den AruBIG awe ta traha na e siguiente departamento:
DVG-oficina central como consehero medico (medisch adviseur)
DVG-na JGZ (jeugdgezondheidszorg)
DVG-JTZ (jeugdtandzorg)
DVG-SPD (socaal-psychiatrische dienst)
DVG-crisis team /control di vacuna
IVA- Inspectie Volksgezondheid Aruba
KPA (Korps politie Aruba)
KIA (Korrectie Instituut Aruba)
Cu e entrega di e registro awe na cada un di e 18 trahadornan publico presente ta un muestra cu Aruba ta prepara pa desaroyonan cercano y ta inverti den su mesun profesionalnan. Esaki ta un yabi pa un aparato gubernamental mas fuerte y resiliente pa e retonan den futuro. E trahadornan publico aki a demostra nan capacidad, a bai mas leu cu tawatin mester pa yuda esnan den necesidad y nan famia, yuda na trabow y colega y ta aporta grandemente den nos comunidad. Ta pa motibo di profesionalnan asina Aruba ta sigui crece, ta innovativo y ta resalta internacionalmente.
Gobierno di Aruba ta reconoce alaves e importancia di e recurso mas importante cu ta e hende. Minister Oduber a gradici nan y alaves a encurasha e sirbidornan publico pa sigui cu nan aporte te asta despues di bai cu pension. Door di esey lo por sigui comparti y inspira otro pa haci mescos. Esey lo ta un bunita gesto pa e siguiente generacion y tambe un aporte pa un mihor salud mental pa nos comunidad. Na tur sirbidor publico cu a ricibi nan registracion, hopi pabien!
