Den un reunion cu board di AHATA, Minister di Naturalesa, Ursell Arends a delinea e resultadonan di e Carmabi raport. Na aña 2019 Directie Natuur en Milieu a laga traha un rapport tocante e calidad di awa y nivel di bida marino na Aruba su costa pazuid y pabou. E raport aki a enfoca riba e impacto cu turismo tin riba medio ambiente.
Minister a splica cu mayoria di nos costanan ta sufri di escasez cronico di bida maritimo (pisca, coral, kreeft etc.). E nivel di contaminacion organico cu tin den nos awanan local mester wordo atendi rapidamente pa e no bira un riesgo pa nos industria turistico.
Minister Arends a splica cu tin diferente fuente pa e contaminacion, entre otro awa di yobida cu ta bai lama, pero ta prinicipalmente e “under capacity” di RWZI pa procesa desperdicio likido ta causante grandi. Esaki ta un problema cu tin basta aña andando, a pasa un periodo largo di negligencia cu awor por resulta den un asunto nacional. Awor e ministerio nobo di naturalesa tin solucion na bista y ta trahando den colaboracion cu entidadnan profesional cu tin conocemento estrecho di e materia y tambe cu instancianan cu por facilita financiamento necesario pa sostene e plannan.
Na aña 1972 ora RWZI Bubali a wordo construi ningun hende a premira cu Aruba su turismo lo ta crese bira un industria asina grandi. Turismo a trese beneficionan grandi pa nos tur y a trese un cantidad grandi di hotelnan, negoshi y casnan. Cu esey a bin tambe un consumo enorme di awa.
Durante e prome lunanan di pandemia, durante e shut-down di frontera y ciere di hotelnan, nos a nota un reduccion grandi di e fluho di awa cu ta yega na e planta RWZI. Esey a duna un oportunidad historico cu a permiti nos profesionalnan analisa data concreto. Esaki a indica cu 65% di e desperdicio likido ricibi na RWZI Bubali ta bin di actividad hotelero.
Turismo por ta e ganador of perdedor di mas grandi. Ta netamente e popularidad di turismo cu ta stimula nos economia ta pone pression enorme riba e facilidad RWZI y cu esey na su turno ta pone presion riba nos economia. E falta di capacidad di e planta pa procesa ta pone pression directamente bek riba industria hotelero. Na final di dia, na Aruba nos economia ta biba di nos lama y nos beachnan.
Minister Arends finalmente a presenta na AHATA cu ya tin solucionnan na caminda. Cooperacion na e solucion di parti tur stakeholders lo ta importante.