E situacion cu nos tin actual ta indica cu e medidanan aki ta suficiente aworaki pero si cos cambia medidanan por escala
Durante Conferencia di Prensa di Gobierno dialuna mainta, Prome Minister Evelyn Wever-Croes a amplia riba e medidanan cu actualmente tin in place pa loke ta trata Covid-19. Crisis Team ta pendiente pa mira mas di cerca kico ta e efectonan di Omcron. E datonan te cu awo ta pone cu lo mantene e medidanan cu tin na vigor aworaki. Sinembargo no por flexibilisa na e momentonan aki aunke cu a haya peticion pa flexibilisa. E medidanan na vigor ta:
Horeca:
- Maximo 8 persona na mesa den restaurant, paden y pafo.
- Bar y Rumshops maximo 4 persona na mesa, paden y pafo.
- Ora di cera ta 1:00 am y Casino 2:00 am.
Tapaboca:
- Uzo di tapaboca ta keda obligatorio, den tur establecimento, incluyendo gym y school.
Bebidanan Alcoholico:
- Consumo di alcohol riba propiedad publico ta keda prohibi henter dia: entre otro pafo di supermercado, bar, restaurant y beach.
Comercio:
- Comercio ta bek na 100% capacidad (cinema, tienda, supermercado, misa). Entiero ta permiti na maximo di 150 persona (si espacio ta permiti).
Deporte:
- Publico: Un maximo di 150 persona paden y 250 persona pafo.
Entretenimiento Musical:
- Ta permiti musica di background solamente y banda musical completo por toca.
BIshita, fiesta y encuentro social:
- Bishita na cas, fiesta y encuentro social na cas of otro caminda ta permiti, cu un maximo di 150 persona paden y 250 persona pafo.
Establecimento nocturno:
- Ta permiti un maximo di 150 persona (si espacio ta permiti).
- Den tur establecimento nocturno por tin solamente hende sinta.
Gebiedsverbod:
- Riba area publico: Parking lot, beach entre 7:00 pm – 5:00 am.
Samenscholingsverbod/ Aglomeracion
- Un maximo di 8 persona.
Establecimento nocturno:
- Ta permiti un maximo di 150 persona (si espacio ta permiti)
- Den tur establecimento nocturno por tin solamente hende sinta.
- Ta permiti musica di background solamente y banda musical completo por toca.
- No ta permiti pista di baile. Solamente Satalite Dancing (canto di mesa).
Tambe tin un maneho di biahero cu a wordo haci mas estricto fin di november caba. Paisnan cu ta cay bou riesgo hopi halto mester test dentro di 24 ora prome cu subi avion. Dus nan no por bin Aruba y test akinan.
“E medidanan aki no ta di awor. Esakinan ta medidanan cu nos ta implementando caba. No ta pa molestia ni abo, ni Gobierno, ni ningun bishitante y sigur no pa Gobeirno haya poder. E unico motibo ta pa protehe abo y bo famia contra e contagio. E situacion cu nos tin actual ta indica cu e medidanan aki ta suficiente na e momentonan aki pero si cos cambia, medidanan por escala.
Pa sigui e conehonan internacional cu ta wordo duna, ban aplica tur e medidanan aki. Tur loke nos sa y bin ta siñando casi pa dos aña caba, ban aplica nan tur, constantemente y bon. Nos tin Omicron na Aruba y awor tur ciudadano mester sigui cuida, ta mas cauteloso y mas estricto cu su mes y mantene e reglanan y asina nos lo logra sali di esaki tambe”, Prome Minister Evelyn Wever-Croes a enfatisa.