ORANJESTAD – Awe mainta Hues, via video conference, a dicta sentencia den e caso penal cu Ministerio Publico a cuminsa contra e damanan Colombiano C.B. (Mami), su prima M.P. y e homber H.F.
Aruba Native por a compronde cu e trio aki a wordo haya culpable di traficacion di damanan di Colombia pa Aruba. E damanan despues tin cu traha den e bar di e acusado C.B.(Mami).
Na November 2021, tratamento di e caso a tuma lugar, caminda Hues a bay hopi extenso riba e investigacion cu basicamente a kibra henter un operacion cu tabata andando pa trece damanan Colombiano ilegal Aruba y laga nan traha den e bar di Mami.
Fiscal a exigi 2 aña di prison pa Mami, 15 luna di prison pa M.P. y 3 luna di prison pa H.F. Tambe el a exigi pa H.F. 120 ora di trabao comunitario y si e no cumpli cu esaki, e lo mester bay 60 dia sera den KIA.
SENTENCIA
Awe mainta Hues a bisa cu e ta haya legalmente proba cu H.F. a duna e damanan placa scondi den aeropuerto pa nan por mustra na Inmigracion. Hues a bisa cu H.F. tabata sa cu e damanan ta ilegal. Despues nan mester duna e placa bek. Nan intension tabata pa nan keda Aruba y no vacacion manera nan ta laga mustra.
Hues a sigui bisa cu e ta haya legalmente proba cu e dama M.P. ta complice di traficacion di hende. Hues a mustra cu M.P. tabatin contacto telefonico cu e damanan pa splica nan kico pa haci. A regla pasashi y estadia den hotel, sabiendo cu nan lo no keda den hotel y lo keda Aruba.
Pa loke ta C.B. (Mami), Hues a bisa cu e ta haya legalmente proba cu Mami a yuda tur 9 dama extranhero drenta Aruba, siendo cu e tabata sa cu nan no por ta na Aruba. Hues a mustra cu Mami tabata duna H.F. placa pa duna e damanan na aeropuerto pa mustra na Inmigracion.
Hues ta haya cu tanto Mami, M.P. como H.F. a tuma un costumber pa laga hende ilegal drenta Aruba. Hues tambe a mustra cu Mami tabata e cabezante.
Pa cu castigo, Hues a bisa cu e ta tene cuenta cu ta casonan serio. Ta trata di traficacion di hende. Esaki no solamente ta viola e maneho di Gobierno pa cu combatimento di estadia ilegal y entrada di extranhero ilegal na Aruba. Tambe e ta contribui na un circuito ilegal na Aruba pa cual e comunidad ta keda frustra y corumpi.
Hues a confirma exigencia di Fiscal pa H.F. El a condena H.F. na 3 luna di prison kitando e tempo cu e tabata sera. Tambe Hues a condena H.F. na 120 ora di trabao pa comunidad y si e no cumpli cu esaki e lo mester bay 60 dia sera.
Hues a condena M.P. na 10 luna di prison, kitando e tempo cu e ta sera den KIA.
Hues a condena C.B. (Mami) na 18 luna di prison, kitando e tempo cu e ta sera den KIA.
