Como ciudadano responsabel e ta importante pa tene nos mes na reglanan di trafico. Esaki ta implica cu bo mester tin un rijbewijs valido y bo vehiculo mester ta sigura, gekeurd y number mester ta paga. En caso tal cu bo no ta cumpli cu un di e rekisitonan akiriba y polis para bo, bo ta core e risico cu polis lo por confisca e vehiculo for di bo, conoci como ‘in bewaring nemen’.
E accion aki tin como meta pa stop un delito di sigui wordo cometi, pues ta duna e persona un multa y despues zorg pa e punto cu no tawata na ordo keda atendi lo mas pronto posibel. Esaki ta aporta na un bida y trafico mas sigur na Aruba.
Sinembargo teniendo cuenta cu e situacion di e garage di polis na Balashi y e procedura of falta di procedura ta haci cu e meta aki no ta keda cumpli. Causa di esaki ta cu falta un maneho fiho y duidelijk ora ta yega na situacionnan asina aki. Un ehempel ta cu autonan ta wordo treci warda sin tin mester of al contrario, esnan cu mester no ta keda confisca paso no tin luga na wardanan pa pone auto. Esaki ta haci cu e trabou di autoridad no conoce un procedura fiho y ta haci nan trabou ni efectivo y mucho menos eficiente. Cada tanto tempo coleganan ta haci un esfuerso masha grandi pa ruim op e cura di warda di polis Balashi pa asina crea espacio.
Nos no mester lubida cu Gobierno ta esun responsabel pa cuida pertenencia di ciudadano ora cu esakinan keda confisca. No ta un secreto cu e tereno no ta sigur, e ta hopi yen y ya na varios ocasion vehiculonan of nan piesa ta wordo horta. Esaki ta un situacion alarmente mirando cu na momento cu e doño bin busca su vehiculo tin chens cu e no ta hay’e den e estado cu el a lag’e of cu e falta piesa. Esaki ta costa Gobierno placa, unda cu tin chens cu pais Aruba lo mester paga e ciudadano daño di perhuicio. Esaki ta costa KPA capacidad pa investiga tambe, capacidad cu por a wordo usa pa otro caso. Pa coleganan cu ta traha den garage y den trafico e ta un frustracion di no por duna un miho servicio.
Pa elimina e frustracion aki for di coleganan y consecuentemente for di ciudadanonan cu tin cu pasa den e procedimento aki mi ta sugeri algun opcion como solucion. Pa di prome e ta importante pa nos por tin un procedura fiho y cla tanto pa autoridadnan como tambe pa e ciudadano. E procedura aki mester ta efectivo y eficiente. Esaki ta conta pa e sitema di multa y tambe pa saca un vehiculo lo mas pronto posibel for di e garage di polis. Por ultimo mester un luga adecua, of haci e lugar adecua, unda por warda pertenencia di ciudadanonan na un manera sigur caminda ta percura cu na momento cu e persona bin reclama su pertenencia e por haya esaki bek manera cu nan a kit’e for di dje.
Como presidente di comision fiho di hustica na parlamento sigur lo mi yama un reunion den e simannan benidero cu tur stakeholders relevante y tambe Minister di Husticia pa nos reuni riba e topico aki y asina hunto yega na un solucion eficiente y sostenibel.