Oranjestad:
Diabierna durante tratamento di e caso di Sr. Carti den corte. E abogado defensor mr. Carlo a cuestiona e hecho con por ta posibel cu diferente biaha un website di noticia a publica den detayes riba e caso aki.
Segun e abogado ta parce mescos cu ta Ministerio Publico mes lo a suministra nan informacion.
Segun e abogado cada biaha cu Carti tabata bay na KZP, e website di noticia 24ora y Tempran ta publica den detayes riba e caso aki. Con por ta? Ki intencion tabata tin cu esaki?
Segun Ministerio Publico nan no a suministra informacion tocante Carti na Prensa. Loke a sali den prensa ta responsabilidad di prensa.
Di otro banda e no ta un secreto con prensa ta yega na tur informacion for di den Husticia. Es mas e modus operandi aki ta bon conoci cerca Ministerio Publico y Alto Comisario. Esaki tabata un di e motibonan pakiko algun tempo atras tabata tin un acercamento di Husticia cu miembronan di prensa cu ta cubri policial.
E motibo principal di e reunionnan tabata, pa trata na caba cu e ‘corupcion’, omkoping etc.cu lo tabata y mas sigur ta sigui sosode. Durante e meeting a papia habri tocante esaki, bisando cu nan sa cu prensa ta hayando informacion ilegalmente for di ‘amigo’ polis. Esaki sigur nan tabata kier a caba cune, haciendo e forma di ricibi informacion policial legal, mescos cu na varios otro paisnan.
Durante e reunionnan te hasta Procureur General, Alto Comisario y ex Minister di Husticia tabata presente, hunto pa yega na un acuerdo mutuo cu prensa pa suministranan cu e informacionnan cu ta essencial pa prensa, pa nan por simpelmente informa pueblo.
Lamentabelmente despues di varios reunion Cuerpo Policial a dicidi pa laga e situacion a keda status quo. Prensa mester sigui cu su trabou di informa pueblo y ta haye obliga di sigui busa informacionnan policial na un forma no legal. Asina dunando tur chens pa cosnan ilegal sigui pasa bou nan nanishi y no yega na un acuerdo cu esnan cu ta haci e trabou di informa pueblo.
No ta nada straño cu informacion di tur departamento di polis ta sali riba caya, mester tin un liña y no por ta hancho pa un banda y small pa e otro banda. Prensa ta e di cuater poder, pero tanten cu no regla esaki na un forma structura, cosnan asina lo sigui pasa y informacionnan cu por ta no mester sali riba caya lo keda sali riba caya.
Si Husticia y prensanan cu ta cubri policial a yega na un acuerdo, drechando asina e relacion entre prensa y Husticia, sigur lo por tabata tin un bon cooperacion y bon entendimento, pero top di Polis mes a kies pa no drecha e situacion actual y sigui laga tur cos bay con cu ta y duna espacio liber pa ‘corupcion’ cu lo por tin den Cuerpo Policial.