AMSTERDAM, HULANDA – Personanan di nacionalidad Hulandes ta dominando na gran escala e traficacion di cocaina pa Europa. Di tur e sospechosonan cu a wordo gara entre januari 2018 pa december 2020, pa traficacion di droga y di cargamentonan di mas di 100 kilo, como 60% tabata di nacionalidad Hulandes.
E informacion aki a sali for di un raport nobo referente traficacion di cocaina for di Latino America pa Europa, Cocaine Insight di Europol y tambe di United Nations Office on Drugs and Crime.
Durante e ultimo añanan a intercepta mas di 100 mil kilo di cocaina den e wafnan di Rotterdam y Antwerpen. E cantidad di droga a bira den 4 aña di tempo, cuater biaha mas hopi. E balor di e droga riba caya ta den careda di 10 biyon Euro (equiv na 21.27 biyon florin).
E cargamentonan di cocaina intercepta na Belgica mayoria tabata destina pa Hulanda y mayoria tabata pa e organizacionnan criminal Hulandes.
Tur cos ta mustra cu interceptacion di droga den e wafnan no a bira menos y tin indicacion fuerte cu e record di e aña anterior lo wordo kibra e aña aki. Di januari 2021 te cu juli 2021, douane y polis di Rotterdam so a intercepta caba mas di 11 mil kilo di cocaina. Ora ta trata di cargamentonan grandi di droga intercepta, e Hulandesnan ta den mayoria.
Awendia no ta facil pa importa cocaina y ta hopi mas facil pa produci’e y distribuy’e. E forma aki di haci negoshi cu cocaina ta mas lucrativo pa e traficadonan di cocaina Colombiano. Polis ta teme pa e violencia creciente na Hulanda, esaki door di e influencia creciente di e cartelnan di droga di Sur America estableci na Hulanda.
Europol ta conseha e paisnan Europeo y paisnan Latino America pa traha hunto y hopi di cerca, intercambia informacionnan referente organizacionnan criminal y traha protocolnan internacional pa transporte maritimo di containernan y capacidad operacional na e wafnan
E meta ta pa detecta e containernan cu ta contene droga, prome cu nan yega na nan destino final. Tambe Europol ta propone pa e paisnan aki crea mas unidad special pa tackle e traficacion di droga cu ta pasa via wafnan.
E investigadornan a señala cu corupcion den wafnan ta un problema cu ta creciendo y cu mester wordo combati cu man duro. E problema di contrabando y traficacion di droga, segun e investigadornan ta premira lo sigui crece. E disponibilidad grandi di droga lo conduci na un aumento di uso y aki e demanda pa droga lo sigui crece.
Cocaina ta e di dos droga mas uza na Europa y ta conta riba un 4.4 miyon usado di Cocaina. Esaki naturalmente ta e motibo principal cu e traficacion di cocaina pa Europa ta sigui crece. Segun e investigadornan tin un aumento enorme den cultivacion di matanan di Coca na Latino America. Tambe tin un crecemento den traficacion di droga, door di e tratado di paz cu FARC na Colombia. Door di e trankilidad aki, e producion y traficcacion di cocaina a bira un poco mas facil.
Un otro desaroyo ta globalizacion di commercio: Organizacionnan criminal na diferente pais ta yega den contacto cu otro facilmente, via telefonnan encrypted of otro forma di comunicacion y esaki ta yuda facilita e labamento di placa y nan por move esaki bou di radar mes. Henter e comercio di droga den e ultimo añanan a bira hopi mas profesionalisa.
E interceptacionnan di bultonan grandi di cocaina, algun riba 5 mil kiko no tabata tin niun efecto riba e prijs. Na Hulanda un gram di cocaina riba caya ta para na 50 Euro, esaki a keda mescos pa basta aña. Segun Europol e cocaina a bira como 25 pa 30% mas puro.
E cargamento di mas grandi intercepta e aña aki, tabata na februari. Despues di un investigacion haci pa recherchenan na Hamburg, Alemania y Antwerpen, Belgica nan a logra intercepta cargamentonan di en total 22 mil kilo di cocaina.
