Oranjestad:
Abogado Illes den su defensa a baha pisa riba e trato inhusto cu Paul Croes a haya na KIA, esaki a afecta Paul mentalmente y cu actualmente e ta bou tratamento psychologico.
Su abogado a cuestiona e forma con Ministerio Publico a limita Paul Croes di tur comunicacion durante e 80 dia cu su famia y tur otro hende, cu consecuencia cu esaki a afecta Paul Croes masha hopi mes. Paul a wordo isola den e seccion unda tin e presonan cu problema mental y asesino.
Paul Croes compara cu Benny Sevinger, pa 22 ora pa dia mester a keda cera den su cel. Pa algun ora so e tabata wordo permiti pa tuma aire. Paul Croes tabata cera su so den un cel, sin un buki pa lesa, sin nada pa e por a destrai su mente ariba. Esaki a afecta Paul Croes cu e ta actualmente bou tratamento psychologico. Paul Croes recordando tur esaki tabata cabes abou ta yora.
E abogado den su defensa a sigui conta cu Paul mester tabata scucha hendenan ta grita den e otro celnan. E abogado ta bisa cu a viola derecho humano di Paul Croes.
Abogado a cuestiona fuertemente e forma inhusto di e acto di Fiscal, door di a ordena pa Paul Croes keda cera den cel sin por a papia cu ningun hende. E la sigui cuestiona ” Con ta cera un persona cu mentalmente ta bon, den e seccion di hendenan cu tin problema mental.” BO no por cera un hende den e seccion cu no ta adecuado pa su persona, anto pa 76 dia largo. Paul tabata cera den un cel chikito den e seccion di hende cu problema mental.
Segun e abogado Paul a keda 80 dia den isolacion, sin un bijbel, caminda cu e tabata tin molester di sangura, di cacalaca y djaca cu tabata pasa den su cel.
Segun e abogado danki na un empleado di KIA cu a haya cu esaki SI ta di mas y a cuminsa laga Paul sigui lesnan di bijbel.
Na final e abogado a bisa cu Paul a wordo cera banda di e cel caminda e asesino Lampe ta cera, Lampe basta aña pasa a mata su mama, tata y ruman y a kimanan.
Ultimo e abogado a cuestiona tambe cu recientemente tabata tin un otro politico(Sr. Benny Sevinger, ex colega di partido di Paul Croes) deteni y encarcela na KIA, pero cu e SI no a wordo isola y ni a haya e trato inhusto cu Paul Croes a haya na KIA, Benny no a wordo trata na e forma cu Paul si a wordo trata, den isolacion, 22 ora cera den un cel chikito sin por a papia cu un hende, riba dje cu molester di sangura, cacalaca y djaka.