Savaneta – Diamars mainta pasa di 11’or un ambulance pasando altura si Lydia’s Kitchen na Savaneta a topa cu un accidente hopi serio y mesora a avisa su base cu ta 911.
911 na nan turno ta avisa polis.
Polis na yegada a constata cu ta trata di un accidente frontal serio. E autonan envolvi tawata un Kia Rio y Nissan Cube.
E accidente frontal a sosode ariba e crusada altura di Lydia’s Kitchen, probablemente un di e chauffeurnan no a tuma e bocht manera mester ta y dal frontal.
Camindanan eybanda mesora a wordo cera pa Paramediconan y tambe polis por cuminsa cu nan investigacion. Specialista di Trafico a wordo pidi tambe.
Paramediconan na yegada a saca e persona for di e Kia Rio y mirando su situacion mesora a cuminsa dune CPR, lamentablemente despues di algun rato no por a haci nada mas.
Instancianan concerni a wordo notifica, manera Sra Janine Rodriguez di Slachtofferhulp.
Por a mira tambe cu un dama cu tawata den e Cube a wordo transporta tambe pa Hospital, pero no tawata mustra dje grave ey.
Arubanative.com kier a manda palabra di condolencia na famia di e fayecido.
