ORANJESTAD – Algemene Rekenkamer a publica su rapport a base di e Supreme Audit Institution (SAI) Performance Measurement Framework (PMF): rapport di analisis riba e funcionamento di Algemene Rekenkamer Aruba a base di e normanan di ISSAI. E rapport aki ta duna un reflexion propio con e organisacion di Algemene Rekenkamer ta funciona. E meta principal di e evaluacion aki, ta pa midi e funcionamento di Algemene Rekenkamer riba su puntonan fuerte y debil. E analisis tambe ta yuda pa pone un paso dilanti den direccion pa mehora e calidad di e investigacionnan door di implementa e normanan di International Standards of Supreme Audit Institutions (ISSAI). E resultadonan di e evaluacion ta sirbi como guia y lo duna e direccion pa por traha e plan di accion cu Algemene Rekenkamer mester tin pa e siguiente temporada.
Algemene Rekenkamer ta dispuesto pa mehora su prestacion interno y tambe demostra su balor na e pueblo di Aruba. Esaki ta den linea cu su plan strategico actual.
Algemene Rekenkamer a haci uzo di e metodologia di SAI PMF, cu ta describi den e SAI PMF document 2016. E evaluacion ta obhetivo y basa riba evidencia. Despues di haci un curso basico online aña pasa na mei, a cuminsa e evaluacion mes na juli 2020. E evaluacion tabata basa riba full e organisacion y no solamente riba e trabao nan di investigacion. Asina a evalua e funcionamento riba por ehempel, e parti legislativo, e organisacion interno, e maneho financiero, e maneho di recurso humano y comunicacion.
Dos area specifico cu a haya claridad durante e evaluacion, ta e necesidad pa modernisa e parti legislativo y tambe pa implementa e normanan di ISSAI den e organisacion pa por garantisa e calidad halto di e rapportnan. Pa por alcansa un miho maneho den e dos areanan specifico aki, Algemene Rekenkamer ta trahando desde 2018 riba un ley nobo. E ley nobo aki tambe lo bay conduci na cambia, entre otro, e Constitucion di Aruba y e Comptabiliteitsverordening 1989. Cambionan den e parti legislativo ta necesario pa por fortalece y aumenta e independencia financiero y organisatorio di Algemene Rekenkamer, cual lo drecha su funcionamento.
E version digital di e rapport di Algemene Rekenkamer ta publico y obtenibel via www.rekenkamer.aw