Mientras formacion ta drentando su di cuatro siman, lo ta bon pa reflexiona ariba resultado di eleccion 25 di juni 2021. MEP a saca 20,700 voto, AVP a saca 18,335 voto, e otro partidonan hunto a saca 19,575 voto. Si tur voto tabata conta igual, nos lo a inaugura un parlamento 7-7-2-2-1-1-1. Nos leynan electoral anticua y inhusto a otorga dos restzetel na MEP aunke nan tabata patras di RAIZ, MAS, PPA, RED y AVP den cantidad di voto pa e siguiente asiento.
Mirando cu tur dos partido grandi a bay atras den voto, mi a haci un yamada na lidernan di RAIZ y MAS pa dialoga. Hunto nos ta representa e un tercera parti di electorado cu a vota contra geel y berde. Sr. Arends, Lider di RAIZ, a nenga di reuni y acusa nos di ta forma parti di un complot. Logica ta dicta cu cinco of cuatro asiento tin mas peso cu 2, dus mi ta puntra mi mes ken realmente tabata forma parti di un complot? MEP sikiera a acerca ACCION21 inoficialmente, algo cu RAIZ no a intenta.
Durante e crisis mas grandi den nos historia, ta remarcabel cu MEP/RAIZ ta opta pa forma e gobierno cu e base inicial mas chikito den nos historia. Stabilidad no por ta e motibo paso sentido comun ta obliga reconoce cu mas asiento den Parlamento ta mas sosten. Goberna cu 11 ta hopi diferente di forma cu 11, algo cu Sra. Wever-Croes ta bibando actualmente. Mi ta puntra mi mes si e decision di forma cu 11 no ta pa maximalisa e cantidad di minister pa ambos partido? Esey lo ta un tristo comienso pa e proximo gobierno di sigui pone interes partidario prome cu interes nacional.
E intentando partnersnan di coalicion, MEP/RAIZ ta representa 26,174 voto entre nan. E supuesto oposicion ACCION 21/MAS/AVP ta representa 26,426 voto. Oposicion tin un mandato electoral mas grandi di voto cu coalicion, con esaki por ta? Mi a suplica Sr. Arends di por fabor inclui modernisacion di nos kiesverordening den cualkier acuerdo di gobernacion. Si no logra esaki lo ta un traicion di e 19,575 persona cu a vota pa cambio real.
Ultimo dianan por a nota movecion pa kita e directornan di WEB apesar cu MinPres a declara den parlamento di no ta na altura di ningun plan di retiro. Tambe ela declara durante tratamento di presupuesto 2021 cu Utilities N.V. no a wordo infiltra politcamente. Awor ta ser menciona posibel reemplasante y mi ta wanta mi curason cu berdad e politica di fix cos pa friends and family lo caba manera e lider di RAIZ a priminti durante campaña.
Durante e prome reunion publico di Parlamento 11, Presidente Vrolijk a purba silencia democracia door di cera e lista di orador, algo sin precedente na Aruba. Imparcialidad di e presidente nobo a keda cuestiona y tambe kiko realmente tabata su proposito, sigur no crea un ambiente constructivo. RAIZ y MAS a introduci punto di ordo pa habri e lista di orador y mirando cu si nan tambe bandona sala e reunion lo perde quorum, Vrolijk a recapacita. Atardi nos a mira e lider di RAIZ, cu no tabata tin ningun pregunta den prome tanda, declara cu gaña rabia y bandona sala ta politica di pasado.
HONESTIDAD ta politica nobo, e resto ta e mesun pantomina di semper aunke disfrasa di un capa nobo. Den tratamento di presupuesto MinTVS a declara cu no tin ningun plan pa hisa edad di pensioen aunke e ta parti di e acuerdo cu Hulanda. Nos a tende MinFEC declara [cu curason y caracter] cu no mester preocupa cu e landspakket paso ta solamente estudio te awor. E realidad ta cu e landspakket ta un serie di medida cu ta sigura cu Aruba lo por cumpli cu su obligacionnan financiero.
Politica nobo ta a base di honestidad paso pueblo merece e berdad. E medidanan specifico di e landspakket ta esnan cu Aruba y Hulanda a negocia pa ta mas suave y cu mihor efecto pa funcionamento di nos pais y finansas publico. Pretende cu no lo tin cambionan severo ta nenga di comparti e berdad cu pueblo. Recientemente p.e. a sali den noticia cu hisando edad di pensioen te cu 66 kisas no lo ta suficiente pa salvaguardia solvencia di SVB.
Awor cu ta negociando reparticion di cartera ministerial, ta importante nota cu cada ministerio ta costa Land Aruba mas o menos 1 miyon pa aña. Den landspakket ta claramente indica cu gastonan di personal di sector publico mester baha te cu 10% di GDP. MinPres a declara den Parlamento cu esaki lo inclui esnan cu ta traha den un fundacion subsidia pa gobierno. Esey ta nifica cu mas ministro e proximo gobierno tin, mas ambtenaar lo mester bay cas.
Den Parlamento ACCION 21 a vocifera nos disposicion di traha cu e proximo Ministro di Finansas y ofrece nos plan di reforma fiscal. Nos plan ta logra hisa entrada di gobierno, baha prijs pa consumidor y haci Aruba e destinacion mas atractivo pa capital den nos region y Reino. Politica nobo ta pone interes nacional prome cu interes partidario, ban cuminsa biba esey.