Diabierna tabata un dia hopi scur pa werksternan den servicio di SKOA pero na mes momento tambe ta democracia, segun lider di fraccion di AVP Mike Emnan a declara dilanti edificio di Parlamento na momento cu tabata trata presupuesto 2021.7.23
“Na momento cu nos miembronan di fraccion tabata para dilanti entrada di Parlamento papiando cu e werksternan, den sala di Parlamento mes Presidente Edgar Vrolijk a dicidi di cera e lista di oradonan.
E presidente a habri e reunion y den mesun rosea a dicidi di cera e reunion pa di e forma aki parlamentarionan no por papia riba entre otro e situacion di e werksternan y tampoco parlamentarionan no por papia riba e presupuesto 2021.
Un presupuesto cu ta colma di medidanan hopi pisa pa henter nos pueblo y cantida di medida mas na caminda y ta sumamente tristo cu democracia di Aruba ta yegando na e punto aki caminda tin un partido RAIZ sinta na e otro banda y cu a bisa cu nan ta parti di un cambio, cu nan ta bay renoba politica y ta bay hiba un politica di otro nivel caminda lo tin miho participacion di parlamento den discusionnan y asina evita cu parlamento lo ta un stempel parliament.
Sinembargo den e reunion aki ta bira coopera cu Presidente di Parlamento pa cera e reunion prome cu cualkier persona por a hiba palabra caminda cu coleganan di nos fraccion tabata ariba den sala buscando e listra di oradonan pero nan tabatin esaki scondi, loke a pone cu nan no por a firma pa hiba palabra.
Mesun tipo di weganan cu nos a mira caba den e reunion pa eligi presidente di parlamento caminda papelnan tabata bayendo rond cu ta algo cu no ta cuadra cu e nivel cu parlamento di Aruba mester tin y mientras cu nos ta papiando cu e grupo di trahadonan aki preocupa cu nan trabou, presidente ta dicidi di cera e lista di oradonan no dunando ningun miembro di Accion 21, MAS y AVP, e oportunidad di ta parti di e debate politico.
Nos ta kere esaki ta un indicacion di algo hopi robes cu pais Aruba ta bayendo na e momentonan aki y aki tin un coalicion cu no tin mayoria di voto si conta nan voto hunto compara cu votonan di AVP, MAS y ACCION 21, y nan ta haci discusion dificil na Aruba.
Ta bay tin un caso den Corte caminda partido AVP a pidi un reconteo di voto y nos a haya awe un proces verbaal cu ta informa cu a kima e stembiljetten mientras cu abogado di AVP dia cu el a entrega e caso el a puntra pa percura pa e stembiljetten no wordo kima a base di e reconteo cu mester tuma luga ainda.
A manda carta pa electeoraleraad pa no kima e stembiljetten, a yama Censo pa no kima esakinan y awe diabierna mainta nos ta haya un proces verbaal cu ta bisa cu dia 9 di juli a dicidi di kima e stembiljetten.
Pues esaki ta nifica cu reconteo tampoco ta posibel mas y nbos a mira sistematicamente un dictadura y e dictadura a yega e punto awe cu Parlamento no por reuni riba presupuestgo 2021 cu ta mas c’un aña lat ya cu e mester a wordo trata prome un di september di aña pasa.
Un situacion hopi hopi scur pa Aruba y si ta esaki ta loke ta spera nos pais cu fraccion di MEP y RAIZ, caminda 11 miembro sinta un banda ta bisa cu nan no tin ningun necesidad pa papia riba umn presupuesto cu tin asina hopi tema di preocupacion riba varios tereno manera enseñansa, perdida di poder di compra, pobresa den nos pais, inkietud cerca tur e institutonan den nos pais, Banco Central cu a caba di saca un rapport di emprobecimento grandi cu tin na Aruba.
Kico nos ta mira cu 11 miembro a dicidi di hunga un wega pa cera e debate politico mientras cu democracia tabata tumando dilanti parlamento, caminda nos tabata scuchando un grupo di trahadonan cu nan inkietudnan grandi.
Pero e lucha ta continua y esaki ta duna nos mas forsa y na mes momento ta hacie pa pueblo mas cla cu ora cu nos bay vota y cu tin partidonan cu ta boga pa un cambio pero awor ta bira complice di un posicion cu ta sumamente scur pa democracia di nos pais,” Mike Eman a declara.