E siman cu a pasa tabata tin tres caso serio di tiramento riba nos isla; Diaranson 7 di juli 2021, den oranan di marduga na San Nicolas, un hoben di 19 aña a wordo tira fatalmente, aparentemente lo tabata trata di un drive by shooting.
Diahuebs den careda di 1’or y mey di marduga, un dama den su auto bayendo cas, na altura di Cas Casuela na Tanki Leendert, a bira victima di un tiramento, desconocidonan a los varios tiro riba su auto y dos di e tironan aki lo a alcansa e dama, na su pia y aparentemente na su barica. E dama a wordo transporta pa hospital.
Diadomingo den careda di 4’or di marduga, otro tiramento, lo ta trata di un otro drive by shooting dilanti Lekker Bar & Restaurant, den cual 11 pa 12 auto a ricibi un of mas impacto di bala.
E problema di arma di candela, no ta un problema di awe y ni di ayera, e ta un problema di decadanan caba. Mescos cu tin control rigoroso riba motorrijtuigbelastin, mester keda constantemente controla den autonan pa mira si nan tin arma.
For di hopi tempo caba tin hopi arma den circulacion na Aruba, te hasta tabata tin un atraco riba Aruba Bank basta aña pasa, den cual un dama a perde su bida, despues di a wordo tira fatalmente pa un di e atracadornan. Atraconan arma riba Casino, riba lugarnan di bende Lotto, atraco riba tiendenan, riba te hasta cuidadanonan, den nan cas y riba caya, den mayoria caso e atracadornan a uza arma di candela.
Tempo cu Sr. Rudy Croes tabata Minister di Husticia, e la yega di duna ordo pa polis tene un accion den cual a duna e pueblo di Aruba e oportunidad di entrega e armanan di candela ilegal cu nan tabata tin den nan poder, anto sin wordo persigui pa cu esaki. E tempo ey un cantidad di diferente arma di candela a wordo kita for di riba caya.
E armanan di candela mayoria lo ta drentando via lama y no via airport, pasobra via airport tin miho control. Riba caya nos ta haya hopi informacion y cu nos a saca nos conclusion, cu mayoria di e armanan di candela ta procedente via coneccionnan entre Venezuela y Aruba. Segun nos a compronde tambe cu un gran cantidad di arma ta drenta via waf, nan ta wordo hinca den diferente productonan, por ehempel den pisca, den Keeshi Blanco, ora kere cu ta keeshi so, memey di e keeshi nan ta sconde un arma di candela.
Tambe e otro forma ta via botonan cu ta trece ilegal, e ilegalnan aki ta trece armanan di candela, droga, bestianan ilegal etc. Ta varios biaha botonan cu a wordo intercepta tabata tin cosnan ilegal abordo. Dia 1 di mei 2018 a drenta un cantidad di persona ilegalmente via un boca pariba di Kapel di Alto Vista, danki na e accion di Cuerpo Policial, cu a keda for di oranan di marduga te den oranan di atardi ta controla e area aki, nan a logra detene un di e ilegalnan, cu tabata tin algun handgranaat y flashbom den su poder. Flashbom ta wordo uza pa atracadornan durante atraconan grandi, por ehempel riba banconan. Cuanto di e handgranaatnan aki SI a logra drenta Aruba sin wordo intercepta? ta keda un pregunta habri.
Locual ta straño, cu masha poco ta scucha cu a gara personanan cu ta den traficacion di arma di candela. Tur ora ta scucha di entradanan hudicial den cual ta confisca droga mayoria, bes plantacion di marihuana of ta confisca articulonan horta. Nunca nos ta scucha cu a haci entradanan hudicial den cual a bin topa cu un arsenal cu un cantidad di arma di candela, nos a scucha rumornan cu na Aruba tin casnan caminda tin bendemento di arma di candela, droga etc, ta tumando lugar, segun nos a compronde cu for di basta tempo autoridad local lo ta na altura di e casnan aki, pero pakiko no a actua no ta conoci.
Algun aña pasa polis a detene un homber Venezolano cu a yega Aruba ilegalmente, e homber aki a conta autoridad cu e prome biaha cu e la drenta via lama, e la trece como 40 arma di candela y a logra bende tur na Aruba. Pues eyfo tin hopi mas cu e 40 arma di candela nan aki. Paso no ta un ilegal so ta trece arma, ta varios ta trece algun arma y bendenan pa asina haya cubri e gastonan di viahe riba lama di Venezuela pa Aruba, cu ta den careda di 450 dollar pa 500 dollar.
Locual nos ta haya straño cu e botonan ta drenta Aruba, hopi biaha nan ta bon na altura unda Kustwacht su boto ta patruyando y si ta safe pa drenta nos awanan. Tambe ta wordo bisa cu na tera mester tin hende ta informa nan di unda y ki ora nan por drenta sin problema, esaki hopi biaha via señalnan di lus na costa. Te hasta tin rumornan, pues no oficial cu lo tin un cas den Colony caminda nan ta yega y unda nan por prepara pa wordo busca, pero nos no por confirma si esaki ta berdad, ta keda den man di husticia pa haci su trabou. Minister di Husticia, KPA y demas departamentonan hudicial ta haci tur nan esfuerzo pa trata na baha e criminalidad na Aruba, pero ta keda tambe na e pueblo di duna nan cooperacion, duna tipsnan valioso di locual nan a mira, of a haya sa, tambe pa bati alarma mesora ora nan mira cualke acto sospechoso, dunando asina un granito pa yuda combati criminalidad y haci Aruba un isla sigur.
E proximo Minister di Husticia sigur mester ta uno cu experiencia, cu tin un bon bista y ta bon na altura di tur e criminalidad cu ta azotando nos isla. Pa asina por cuminsa mesora cu man duro combati, corupcion den Husticia, pone mas vigilancia na e costanan rond di nos isla, pa haci’e imposibel via lama, cu nan por sigui trece arma, trece ilegalnan, pasobra un persona di bon boluntad ta drenta nos isla via airport y no scondi den marduga via lama.
Mester pone mas personal pa haci miho y extra control na waf, vooral ora di controla containernan y productonan cu ta drenta nos wafnan, pa trata na evita cu mas arma ta sigui drenta Aruba.
Busca pa detene esnan cu ta den e negoshi di arma di candela, tambe cambia ley y castigo mas severo pa personanan cu tin armanan di candela den nan poder. Aruba mester mas cachonan getrain cu por detecta arma y municion. Duna pueblo un chens pa entrega nan armanan di candela y sin wordo persigui.
Mirando e cantidad di casonan den cual arma di candela ta envolvi ta un muestra cu e negoshi di arma na Aruba ta creciendo.