Dialuna anochi despues cu e resultado di e votonan individual di cada candidato a keda conoci, Minister President di Aruba, Sra. Evelyn Wever Croes a keda hopi sorprendi pa e cantidad di voto cu su persona a ricibi y a bira e prome votegetter femenino di Aruba.
Evelyn Wever Croes ta gradici tur e 7518 votadornan cu a deposita nan confiansa den su persona y tambe e 20.700 personanan cu a pone nan confiansa den Partido MEP. Lider di MEP ta garantisa tur su votadornan y tambe tur cuidadano di Aruba cu E sigur no lo defrauda nan.
Evelyn Wever Croes ta considera esaki un reconocimento grandi pa e trabounan duro cu a wordo haci den e ultimo 3 aña y 9 luna.
E trabounan aki no ta solamente di su persona, pero di henter un ekipo, e ministernan, e Crisis Team y e team completo di partido MEP. E la keda hopi agredicido pa e sosten grandi aki.
E resultado aki tabata un sorpresa pa motibo cu partido MEP tin un cultura y un sistema di campanja diferente na otro partidonan. MEP no ta campanja pa e lider, haya mas hopi voto. Ta poco biaha den pasado cu un lider di MEP ta bira e votegetter y cu tin un diferencia asina grandi di lider y candidatonan.
Na 1983 tempo cu Betico dfm tabata lider di MEP, e aña ey, Betico a wordo tira pa un agente policial y a keda seriamente herida. Betico a wordo manda den exterior pa tratamento medico. Betico Croes dfm a pone un record cu nunca mas por a wordo kibra pa niun otro lider, e aña aki e la logra haya 10.506 voto y e votegetter cu a marca historia.
Despues na 1985 un biaha mas Betico Croes dfm, como lider di MEP a bira votegetter cu 8879 voto, despues di a wordo demonisa y tira cu hopi lodo pa oposicion. Na 2001 lider di e tempo ey di MEP, Sr. Nelson O. Oduber a bira e votegetter na Aruba.
E elecion aki pa prome biaha den historia di Aruba, e votegetter ta un dama. Sra. Evelyn Wever Croes, lider di partido MEP, pueblo a dune 7518 voto.