ORANJESTAD – Awe mainta e tratamento di e caso penal contra Rudy Carti no a sigui completo. Esaki riba peticion di su abogado mr. Carlo, kende ta haya cu teniendo cuenta cu Corte ta sera merdia relaciona cu eleccion, no tin suficiente tempo stipula pa e caso.
Aruba Native a compronde cu Hues a honra e peticion di mr. Carlo pa scucha e tres testigonan cu el a bin cun’e. Despues a pospone e caso. Den sala di Corte tabata presente e cuater damanan cu a haci denuncia contra Rudi Carti.
Fiscal ta acusa Carti di abuso sexual y inmoralidad riba cuater dama. Fiscal a menciona 8 dama cu a haci denuncia. Fiscal a menciona cu ta sospecha Carti lo a haci abuso sexual of inmoralidad na November 2020, na September 2018 y entre 2012 y 2015.
Hues a mustra cu Carti a nenga di papia durante ultimo interogacion. Carti a bisa Hues cu el a haci esaki pasobra ningun di e interogacionnan, su abogado no por tabata presente. Hues a puntra si su abogado ta presente e ora si. El a bisa cu e ora ey e lo ta dispuesto pa contesta preguntanan.
Abogado a mustra cu 6 Mei 2021, diripiente Fiscal kier splits caso di labamento di placa di e caso inmoral. Esaki pasobra ainda caso di labamento di placa no ta cla. E ta haya esaki no ta practico y a pidi Hues pa trata tur dos caso hunto.
Fiscal a reacciona cu ora a planea caso regiezitting ta pa haya sa si tin mas deseo di parti di abogado. Abogado no a bisa nada. Awor e abogado ta bin cu testigonan y Fiscal no ta haya nan relevante. El a bisa Hues cu e testigonan no tabata presente ora cu Carti lo a mishi cu e patientnan. El a pidi Hues pa rechaza e peticion pa scucha testigonan. Pa loke ta e caso labamento di placa, no tin ningun decision ainda si lo bay persigui Carti. Mr. Carlo a reacciona cu si no tin caso, duna Carti su placa bek. El a bisa Hues cu e placa ey ta e placa di pensioen di Carti, cu el a bin ta spaar. Cart a bisa Hues cu el a pidi e miembronan di KZP pa e demostra con e ta duna tratamento pa asina demostra su inocencia pero el a wordo nenga.
Hues a honra e peticion pa scucha e testigonan. A cuminsa cu e señora di Carti., kende a bisa cu nunca el a sinta come cu patient na su cas. E señoranan K. y W. a splica con nan a haya tratamento di Carti. Tur dos a bisa cu nunca Carti a mishi na nan partinan intimo.
Hues a bisa cu mirando e tempo, lo mester pospone tratamento di e caso. A keda palabra cu dia 17 September 2021 lo tin tratamento di e caso. Entretanto lo mester laga abogado ta presente ora ta interoga Carti.