Booshi Wever di UPP a sinti e necesidad di dirigi un carta na sindicatonan di Aruba pa asina atende cu e preocupacion pa parti di e contenido di e landspakket cu ta na caminda, pa loke ta trata flexibilisacion di e leynan laboral y tambe esun di LTU.
Pa hopi tempo UPP como partido pafo di Parlamento, a bin ta denuncia corupcionnan y mal gobernacion aki na Aruba, y a mustra constantemente cu si nos no para e cosnan aki Hulanda lo mete mas directo den nos asuntonan.
Mientras tabata colga un menasa continuo di metemento di parti di Hulanda, pasobra nos gobiernonan desde 2013, cu e Witte Donderdagakkoord, te na e Acuerdo di 22 november 2018 no a sa di cumpli, cu loke nan a combini. Y e crisis di COVID-19, a duna Hulanda e oportunidad perfecto pa obliga Aruba acepta su condicionnan, pa asina por a haya placa fia. Placa cu sigur tabata necesario pa mantene Aruba riba pia, pero cu si nos a sa di cumpli cu nos palabracionnan, si nos a bin cu bon gobernacion y cu si nos a traha dam warda awa, Hulanda lo tabata tin otro postura pa cu nos. Asina aki Hulanda a logra di impone awo un COHO, RAFT y un Landspakket, cu ta mina grandemente nos autonomia.
Pa loke ta Landspakket, por bisa cu parti grandi UPP por biba cu ne, siendo cu ta metanan cu UPP pa hopi tempo a bin ta atende riba nan.
Loke si UPP ta contra, ta e parti di flexibilisacion di leynan laboral, unda cu ta bin cu e concepto di “hire and fire”, mientras ta propaga tambe pa cambia nos LTU y haci entrada di trahadonan di afo mas flexibel. Di e ultimo aki caba e flexibilisa un parti pa Hulandesnan Europeo, pero cu tambe alfinal lo por conta pa Americanonan cu kier bin traha na Aruba.
Loke cu Booshi Wever kier a vocifera cu e carta aki ta, cu durante e debatenan ultimo, tur partido politico, cu excepcion di UPP a duna di conoce cu nan ta di acuerdo cu e flexibilisacion di ley laboral. Pesey UPP a haci un apelacion na e lidernan sindical, pa mustra nan miembro riba e peliger di vota pa e partidonan politico cu si ta para cu e flexibilisacion di nos leynan laboral y esun di LTU. Pa por kibra e tendencia anti-obrero aki, e trahado mester reflexiona y duna UPP e sosten necesario pa ta nan voz den Parlamento y pa cu Hulanda.
Na Aruba nos NO por permiti pa e fenomeno “hire & fire” haya bida atrobe. E lider di AVP a purba un biaha mas di manipula dor di pretende di ta contra e “hire & fire”, pero ta e mes a firma e contracto cu Citgo cu ta permiti e “hire & fire ” aki.
E otro flexibilisacion cu UPP ta contra ta esun di e nos LTU. E flexibilisacion aki lo nifica cu e clase trahador un biaha mas lo ser perhudica si NO RE-INTRODUCI e asina yama “Swiss-model”. E “Swiss-model” aki lo proteha TUR esnan bibando aki na Aruba. Nos tur sa cu Aruba ta SOBREPOBLA! Den cuadro di e flexibilizacion di e LTU ta wordo papia cu lo mester permiti 28.000 hende wordo trecí di
exterior. Kico esaki lo nifica y ki consequencia esaki lo tin pa e clase trahador? Sin e “SWISS-MODEL” e momento cu trece un hende di exterior conforme e asina yama “family life treaty” Aruba MESTER
permiti un reunificacion di famia, cu lo nifica un 60.000 hende EXTRA.
Pa e motibonan aki Booshi Wever, tanto como ciudadano y como un politico social democrata, ta considera necesacio manda un advertencia di e peligernan eminente pa e clase trahador cu ta describi den e landspakket!
17 juni 2021
Booshi Wever
Brazil 163