ORANJESTAD – Recientemente colega sr Roque Maduro a cumpli 42 aña den servicio na nos prestigioso Departamento di Aduana.
Diaranson dia 2 di juni ultimo su estimado coleganan a organiza un marcha na seccion di Barcadera como sorpresa pa despedi di Sr. Roque. Sigur un momento bunita y alabes emocional como recuerdo pa tur loke Sr. Roque a haci di curason pa su dienst. Alabes diahuebs dia 3 di juni den un rato ameno na Bureau di Minister di Finansa, Asuntonan Economico y Cultura, y den presencia di Directeur di Aduana y Chef suplente di Sr. Maduro, Minister Xiomara a felicita Sr. Maduro pa e sosten y tempo brinda pa labora pa su pais.
Señor Roque Maduro a cuminsa na Departamento di Aduana dia 16 di juli 1979. Durante su añanan di servicio Roque a crece y eherce diferente funcion. Roque a haya un promocion pa e rango di Kommies der Belastingen 2de Klasse na aña 1985. Na aña 1993 Roque a drenta den e rango Kommies der Invoerrechten en Accijnzen 1ste Klasse y na aña 1998 Roque a ser promovi pa e rango Kommies der Invoerrechten en Accijnzen 1ste Klasse A.
Tambe ta importante pa menciona cu señor Roque tabata encarga cu e training di e peloton di douane y alabes a fungi como e commandant di e peloton pa Departamento di Aduana por luci na tur plechtigheid. Ademas, Roque tambe a yega di maneha e softball team di Douane.
Señor Roque a sirbi na nos organisacion cu alma, cuerpo, curason y tin un experticio amplio riba diferente area. Durante 42 aña Roque a desplega un carera ehemplar y a sa di aporta positivamente na nos departamento. Coleganan sigur lo haya su falta.
Gerencia y Staf di Departamento di Aduana ta felicita colega Sr. Roque y ta dese’e tur cos bon den su etapa nobo como pensionado.
#########
