Falsificacion di paspoort ta valsheid in geschrifte, pa e delito aki tin un castigo basta pisa, esaki por varia di un aña te 8 aña di castigo di prison. Tambe por impone castigonan adicional.
Oranjestad; Diamars den oranan di mainta, un oficial di Censo a bati alarma na momento cu e la detecta un dama cu un paspoort falso den su poder.
Polis mesora a bay na Censo y despues di a papia cu e ambtenaar di Censo a detene e dama aki. E dama a wordo hiba Warda di polis, pa asina mesora cuminsa haci mas investigacion, con e paspoort falso aki a yega den poder di e dama, ken a otorga e paspoort.
No ta descarta e posibilidad cu lo por tin mas paspoort falso den circulacion. Tambe tin rumornan ta circula cu posibelmente lo por tin I.D. falso tambe den circulacion.
Mirando cu elecion ta den porta, lo ta bon pa tene extra control riba I.D. y paspoortnan otorga especialmente na personanan cu no ta naci na Aruba. Pa asina evita cu esnan cu no tin derecho di voto, bay vota ilegalmente.
E personanan cu nacionalidad Hulandes, automaticamente cu ta inscribi na Aruba y ta riba 18 aña tin derecho di voto, nan mas sigur no tin e necesidad di un ID of paspoort falso.
