UPP a bin ta señala cu e partidonan tradicional ta autor intelectual di e desaster cu Aruba ta hinca aden actualmente. E motibo principal ta nan falta di transparencia y integridad asisti pa un Parlamento cu a wordo degrada pa e categoria di “cheerleader”!
Desde 1996 un cantidad di investigacion a tuma lugar encuanto gobernacion y husticia na Aruba. E prome rapport cu a wordo publica ta di e “commissie Van Lennep”. Aki ta haci recomendacion con pa reduci gasto di personal entre otro. Kico a sosode? Enbes di a reduci gasto e diferente gobernacion a prefera di compromete gobierno cu mas gasto door di entre otro sigui aumenta cantidad di personal di gobierno y aumenta cantidad di departamentonan. Pa mas informacion di e tantisimo investigacionnan cu a tuma lugar desde 1996 por google: Chronologisch overzicht van voor het WODC-rapport ‘De staat van bestuur van Aruba’.
Ta mas cu obvio cu e pasenshi di e gobierno Hulandes a yega su limite ora a ripara cu e Islanan no tabata tin ningun intencion pa reduci gasto di gobernacion. Es mas hasta cu supervision financiero e debe a sigui aumenta exorbitantemente. Aruba no tabata haya necesario pa atene su mes na palabraciona haci cu Hulanda pa reduci gasto y hasta bou supervision di CAft desde 2014, a logra duplica e debe nacional. Gobierno Hulandes a menasa na diferente ocacion cu un “aanwijzing” y ni esey a percura pa gobiernonan di Aruba cuminsa pensa den trece cambionan necesario pa salbaguardia nos finansas publico. Alcontrario e maneho di gobierno tabata wordo caracterisa pa sigui aumenta gasto di personal y sigui introduci departamentonan nobo y sigui bin cu proyectonan dudoso y cu pueblo al final tin cu paga pe.
Di un banda, Covid a brinda Hulanda e oportunidad sublime pa interveni cu COHO y e Landspakket. Pero di otro banda, Covid a brinda e gobierno di Aruba tambe e oportunidad no solamente pa scapa un “aanwijzing”, pero tambe pa trata na desvia atencion di e falta di transparencia y integridad den gobernacion. Gran parti di e conferencianan di prensa di gobierno tabata dedica na informa riba e maneho di e pandemia. Tabata mustra riba e importancia pa nos pueblo atene na e reglanan pa evita plamamento. Entre otro a mustra riba e peliger di aglomeracion. Vacunacion masal a yuda pa e casonan cuminsa baha y poco poco a cuminsa flexibilisa e medidanan. Remarcabel ta sinembargo cu net dilanti porta di eleccion diripente a dicidi pa reduci e medidanan pa evita aglomeracion. No a tarda mucho cu aglomeracion di principalmente e partidonan tradicional grandi a cuminsa tuma lugar. Tur posibel conseho pa actua responsabel a perde tur validez instantaneamente. Fanaticonan lidera pa e miembronan prominente di e partidonan a cuminsa aglomera manera nada no a pasa.
Durante e pandemia un frase hopi usa tabata ta cu nos mester siña biba cu un “mayan diferente y nobo”. Wel e comportacion di e lidernan di e partidonan grandi NO a cambia pa nada. Nan palabra no bal nada. Interes di partido y personal ta bin na prome lugar. “Laat Aruba maar stikken toch”. Pueblo mester por realisa pa awor cu e lidernan di e partido grandi, di boca pafor ta predica cambio, pero nan comportacion ta indica cu na lo sigui cu mal maneho y lo sigui perhudica un desaroyo diferente den interes general di nos Isla. E weekend tras di lomba aki sigur tabata otro ehempel. Si ta esey nos pueblo kier, anto sigui vota pa e partidonan grandi, pero mester prepara tambe pa e medidanan Hulandes ora bira pio. Ora e prima di AZV aumenta!! Ora e pakete di AZV wordo reduci!!
UPP ta ofrece un cambio cu lo cuminsa cu introduci reglanan estricto di Bon Gobernacion pa mara mannan di e político y duna Parlamento e poder pa controla gobierno debidamente y caba cu e corupcion cu a trece asina hopi pobresa na Aruba.
REBOOT ARUBA 2.0 ta di vital importancia pa berdaderamente Aruba lanta den un Manece Nobo.
ZERO CORUPCION = ZERO POBRESA y 100% DESAROYO!