Steunpunt, Savaneta Kamp: Diamars mainta Warda Costa den un entrevista a informa na prensa cu tin un boto perdi cu tres persona abordo.
Tur tres persona abordo ta di nacionalidad Chines, nan a sali diadomingo anochi bay pisca den un piñero blanco, matricula A-2266 y te cu Dialuna nochi nan no a regresa.
Dialuna anochi, e famia cu tabata hopi preocupa a bati alarma, pa motibo cu nan ser kerinan no a yega bek.
Nan lo a sali cu e boto for di banda di Hotel Marriott, nan custumber lo tabata di bay pisca banda di pabou di Aruba. Te cu diamars no tabata tin contacto cu e piscadonan aki.
Segun Warda Costa e famia a tarda pa bati alarma, pero asina mes henter dia Diamars e avion Dash di Warda Costa ta buscando y lo keda te anochi 8’or ta buscando pa e boto perdi, dje lo bay mira kiko lo ta e siguiente plan.
Warda Costa no por a haya mucho informacion concreto y ta pidi piscadonan tambe pa ora nan bay pisca pa laga sa den cua area nan lo bay pisca pa si acaso algo pasa, Warda Costa lo sa unda pa cuminsa busca. Tambe pa no bati alarma laat, miho trempan, pa asina gana tempo y buskeda anochi ta hopi dificil.
