Moko – Diamars den oranan di mainta polis a duna un Nissan March cu 5 hoben den dje un stopteken, pero e chauffeur a prefera di core pa polis.
Di e manera aki a cuminsa un persecusion den area di Montaña.
Eynan e patrouille y despues mas refuerso a cuminsa bay nan direccion pa yuda.
Un persecusion cu a pasa den barionan di Sero Janchi, Sabana Liber, Alto Vista, Kudawecha, Calbas y ta termina den e area di Moko Residence.
E Nissan March coriendo pa polis a dal contra un cura di cas, unda tur 5 ocupante a baha core bay lagando nan slofnan di Adidas atras.
Ariba caminda principal di Moko pa Calbas polis a haya un y ta detene mesora, den Moko Residence polis a detene un otro y a pone drumi ariba su barica. E hoben aki tawata sangra for di e un pia, posiblemente e lo a corta su pia ora nan a baha core bay lagando nan slofnan atras y un mas.
Tur 4 a wordo aresta den Moko Residence.
Mester bisa un buskeda grandi, di Cuerpo Policial pa a haya tres di e hobennan cu tawata den e March.
Durante e persecusion chauffeur di e March na mas cu un ocasion lo a manda e auto den direccion di e patrouille.
Ta trata di un grupo di hoben cu a pone nan bida y tambe di otro cuidadano na peliger momento cu nan a nenga pa para pa polis.
