Nuña: Diabierna anochi algo prome cu 11’or y mey di anochi, polis ta wordo informa cu lo tin un fiesta clandestino tumando luga na un cas na Nuña.
Mesora a manda varios patruya na e adres, na prome instante e personanan paden no kier a habri porta pa polis. Despues di basta papiamento, nan a habri porta pa polis.
Como 10 hoben a wordo saca for di e cas y tur 10 a keda deteni, tabata trata di un fiesta di 8 mucha homber y 2 mucha muher.
Transport di CEA y transportwagen di polis a transporta e 10 hobennan pa warda di Shaba caminda nan lo mester presenta dilanti sub fiscal, kende mas sigur lo duna nan un boet di mil florin pa cada un.
Siman pasa tabata tin un fiesta clandestino na Mahuma, caminda nan a detene 20 persona y e biaha aki 10. Nos tin informacion cu mayan lo por bay tin un Fiesta Clandestino den area di Noord.
Esaki ta demostra cu asina mes cu tanto concientizacion den media di parti Crisis team, ainda tin hende cu no ta conciente di cuanto daño y tristeza Covid-19 a trece den varios hogar na Aruba.
Na Aruba ya caba nos tin 82 persona cu a perde nan bida door di Covid-19. Hendenan cu si nan no a wordo contagia cu Covid-19 ainda nan lo por tabata bibo.
