Oranjestad – Ariba 26 di maart 2011, un diasabra den careda di 7’or di anochi, bario di Pavia a wordo sacudi pa un tragedia/un drama pasional.
Un homber a tira su pareha varios biaha y na yegada di tanto polis y paramediconan, e muhe tawata tin un saco di plastic ariba su cabes.
E diasabra anochi ey e bario tawata bou di sirena di polis y ambulance, yegando e sitio pa duna prome auxilio.
Mesora e area a wordo cera, pero asina mes e noticia a core hopi lihe y masha hopi hende a yega na e sitio pa mira kiko tawata pasando.
Tawata trata di un caso di tiramento, unda un pareha masha conoci den comunidad tawata envolvi.
26 di maart 2011 tur locual por a bay robes a bay robes.
Jaloersheid a hunga un rol of tabata e motibo principal.
Junior “Blauw” Quandt, e diasabra anochi ey den maart a dicidi di trata na pone fin na bida di Chaldira Vis.
Blauw a los varios tiro ariba Chaldira y tambe pa sigura cu e ta muri e la mara un saco di plastic color geel ariba su cabes. Polis y Paramediconan a hayanan cu e dama den un plas di sanger y cu e saco di plastic ariba su cabes.
Chaldira e ricibi 3 impacto di bala e anochi ey cu tawata den pecho, cachete y garganta cu lo lage un persona invalido pa resto di su bida.
E problema lo a cuminsa e dia ey ariba Palm Island. Esaki a causa problema ora cu nan a yega cas y Blauw a haci locual ya ta conoci, pues jaloersheid a hunga un rol hopi grandi den e tragedia aki. Segun nos a compronde cu Quant a usa un excusa di un mensahe riba Blackberry pin pa trata na hustifica su acto y pa mira si asina e lo por haya menos castigo.
September 2011 Blauw a wordo sentencia na un castigo maximo di 15 aña di prison, pero a sinta solamente 10 aña.
Diabierna awor Junior “Blauw” Quandt(44) lo sali liber, despues di a pasa 10 aña di su bida tras di tralie na KIA. Mientras Chaldira si pa resto di su bida lo mester biba cu tur e handicapnan cu e tragedia aki a caus’e, 10 aña pasa.